Senator Ázerbaıjan elshisin Qazaqstandaǵy dıplomatıalyq mısıasynyń aıaqtalýyna baılanysty qabyldady.
Qazaqstan Parlamentiniń Senat Tóraǵasy Máýlen Áshimbaev elimizdegi dıplomatıalyq mısıasynyń aıaqtalýyna baılanysty Ázerbaıjannyń Qazaqstandaǵy Elshisi Rashad Mammadovty qabyldady, dep habarlaıdy Almaty-akshamy.kz Cenattyń baspasóz qyzmetine silteme jasap.
Kezdesý barysynda Máýlen Áshimbaev Rashad Mammadovqa Qazaqstan men Ázerbaıjan arasyndaǵy dostyq qatynasty nyǵaıtýǵa qosqan zor úlesi úshin alǵys bildirdi.
«Bizdiń halyqtarymyz arasyndaǵy baılanys tereńnen tamyr tartady. Táýelsizdik alǵaly beri qatynasymyz ózara senim men túsinistikke negizdelip, jańa mánge jáne strategıalyq seriktestik sıpatyna ıe boldy. Qazirgi tańda eki eldiń ózara yntymaqtastyǵy tarıhı dástúrge taban tirep, barlyq salada nátıjeli damyp keledi», – dedi Máýlen Áshimbaev.
Sonymen qatar Senat Tóraǵasy parlamentaralyq yntymaqtastyq Qazaqstan-Ázerbaıjan qatynasyndaǵy mańyzdy tetikterdiń biri ekenin aıtty. Qazirgi tańda eki eldiń parlamentaralyq baılanysy ekijaqty negizde de jáne PA, TMD, TúrkPA, EQYU PA jáne Parlamentaralyq Odaq sıaqty halyqaralyq qurylymdar aıasynda da belsendi damyp keledi.
Óz kezeginde Rashad Mammadov Senat basshysyna Elshi retinde atqarǵan qyzmetine qoldaý bildirgeni úshin alǵysyn jetkizdi.