Almatyda 15-16 sáuír kúnderí «Almaty theatre» sahnasynda «Shíder» qoıylymynyń premerasy kórermenge jol tartady. Būl tuyndy Qazaqstandaǵy alǵashqy detektıv-drama retínde ūsynylyp otyr, – dep habarlaıdy aqshamnews.kz tílshísí.
Qoıylymnyń ózegínde mahabbat pen paryz arasyndaǵy tartys jatyr. Shyǵarmada bír dáuírdíń perzentterí Qosan men Aqjannyń taǵdyry suretteledí. Olardy tabystyrǵan – Almatynyń ystyq kóshelerí, al aıyrǵan – ómírdíń kúrdelí joly. Bírí el úshín únsíz qyzmet etken barlaushy bolsa, ekínshísí – memleket qauípsízdígín shette júríp qorǵaǵan azamat.
Spektaklde ekí egemen eldíń múddesí, barlau álemíníń qūpıyasy, jeke sezím men el aldyndaǵy jauapkershílík arasyndaǵy kúres kórínís tabady. Tuyndanyń negízgí ıdeyasy – el taǵdyry men adam janynyń názík ıírímderín qatar ashu.
Qoıylym avtory – Baqytjan Qarategí. Sahnalyq nūsqasyn Mıras Ábíl ázírlegen. Al rejısserí – Qazaqstanda ǵana emes, TMD keńístígínde de tanymal suretker Álíbek Ómírbekūly. Ūıymdastyrushylardyń aıtuynsha, spektakl jastardyń patrıottyq ruhyn kóteríp, ónerge degen qyzyǵushylyǵyn arttyruǵa baǵyttalǵan.
Basty rólderdí Qazaqstannyń eńbek síńírgen qaıratkerí Aınūr Bolat pen «Qūrmet» ordeníníń ıegerí Erjan Nūrymbet somdaıdy. Qoıylymnyń janry – detektıv-drama, ūzaqtyǵy 2 saǵat, jas shekteuí – 16+.
Premera 15-16 sáuír kúnderí saǵat 19:00-de «Almaty theatre» ǵımaratynda ótedí. Mekenjaıy: Ál-Farabı dańǵyly, 30.
