Almatynyń tau klasterín damytu ayasynda tauly aımaqtardyń adam qabyldau múmkíndígí bes esege arttyryp, táulígíne 30 myń adamǵa deıín jetkízu josparlanyp otyr. Būl turaly Almaty qalasynyń Turızm basqarmasynyń ókílderí aıtty.
Joba turıster sanyn bírkelkí retteuge, tabıǵı ekojúıege túsetín salmaqty azaıtuǵa jáne tau baǵyttaryndaǵy qauípsízdík deńgeıín arttyruǵa múmkíndík beretín zamanauı, basqarylatyn ınfraqūrylym qūrudy maqsat etedí.
Almaty qalasy Turızm basqarmasynyń basshysy Ǵalıya Toqseıítovanyń aıtuynsha, taudyń jaqyndyǵy qalanyń basty básekelestík artyqshylyǵy.
"Almaty tauly aumaq qala ortalyǵynan nebárí 20-30 mınuttyq jerde ornalasqan álemdegí sanauly megapolısterdíń bírí. Būl jetekshí tau turıstík baǵyttaryn qalyptastyruǵa, turızmdí tūraqtylyq pen tabıǵatqa janashyrlyqpen qarau qaǵıdattaryna súıene otyryp damytuǵa zor múmkíndík beredí", – dedí Ǵalıya Toqseıítova.
Turızm basqarmasynda búgínde turıstík sala jahandyq jalpy íshkí ónímníń 10 paıyzyna deıín úles qosatyny, al ınfraqūrylymǵa salynǵan árbír dollar 15 dollarǵa deıíngí jıyntyq ekonomıkalyq tıímdílík ákeletíní aıtyldy. Tau shańǵysy turızmímen aınalysatyn bír turıstíń ortasha táulíktík shyǵyny shamamen 350 dollar. Būl tau turızmín damytu Almaty úshín ekonomıkalyq tūrǵydan asa mańyzdy baǵyt ekenín kórsetedí.
Sonymen qatar, turıster sanynyń ósuí tauly aumaqtarǵa aıtarlyqtaı júkteme túsíríp otyrǵany da aıtyldy. 2018 jyldan berí Íle-Alatau ūlttyq sayabaǵyna kelushíler sany 4,5 esege artsa, "Shymbūlaq" tau kurortyna kelushíler sany 2,5 esege ósíp, jylyna 1,5 mıllıon adamǵa jetken.
Almaty tau klasterín damytu men "Shymbūlaq" kurortyn jańǵyrtu būǵan deıín Memleket basshysy Qasym-Jomart Toqaev tarapynan elímízdíń turıstík salasyn damytudyń basym baǵyttarynyń bírí retínde aıqyndalǵan bolatyn.
Almaty tau klasterí jyl boıy jūmys ísteıtín kóp mausymdy turıstík óním retínde damyp otyr: qysta – tau-shańǵy turızmí, jazda – haıkıng, ekologıyalyq soqpaqtar men velosıped baǵyttary. Aumaqtyń edáuír bólígí kez kelgen jan úshín qoljetímdí kúıínde qalady. Barlyq jobalyq sheshím ekologıyalyq talaptardy saqtaı otyryp jáne qoǵamdyq talqylau arqyly júzege asyrylady.