Almaty qalalyq kardıohırýrgıa ortalyǵy tarıhynda alǵash ret júrek transplantasıasy jasaldy, dep habarlaıdy Aqshamnews.kz tilshisi.
Naýqas – 34 jastaǵy qala turǵyny. Operasıadan keıin úıine shyqqan jigit óziniń júrek problemalarynyń energetıkalyq sýsyndardy kóp ishýinen bastalǵanyn ashyq aıtty:
«Bastapqyda kúnine 1-2 energetık ishetinmin, keıin ártúrli túrinen kúnine 10 bótelkege deıin jetti. Bul meniń qateligim boldy. Dárigerlerime alǵysym sheksiz, olar meniń ómirimdi saqtap qaldy», – dedi naýqas.
Densaýlyq saqtaý mınıstrliginiń málimetine qaraǵanda, naýqas donorlyq kezekte turǵan. Operasıa bes saǵatqa sozyldy jáne sátti aıaqtaldy.
«Naýqasqa termınaldy sozylmaly júrek jetkiliksizdigi dıagnozy qoıylǵan. Júrek transplantasıasyn Almaty qalalyq kardıologıalyq ortalyǵynyń mýltıdısıplınarlyq komandasy University Medical Center (Astana) mamandarymen birlese otyryp oryndady. Operasıany QKO dırektory Ermaǵambet Qýatbaev pen UMC basqarma tóraǵasy, profesor Iýrıı Vladımırovıch Pá jetekshilik etti. UMC komandasy áriptesterin qoldaý úshin Almatyǵa jedel keldi», – dep habarlady DSM baspasóz qyzmeti.