Aqshamnews.kz redaksıasy "Kún sany" aıdarynda aptanyń eń mańyzdy derekterine sholý jasady.
1,4 mln tonna qaldyq jınaldy
"Taza Qazaqstan" aksıasy aıasynda byltyr jyl basynan beri búkil el boıynsha 1,4 mln tonna qaldyq jınalyp, eldi mekenderde 2 mln 400 myńnan asa aǵash otyrǵyzyldy. Aksıaǵa qatysýshylardyń jalpy sany shamamen 9 mln adam, onyń ishinde 448 myńy eriktiler.
"Taza Qazaqstan" bastamasy tek qoqys jınaýmen nemese aǵash otyrǵyzýmen shektelmeıdi. Bul áldeqaıda tereń jáne aýqymdy joba. Onyń basty maqsaty – qoǵamda ekologıalyq bilim men mádenıetti qalyptastyrý. Bizdiń basty mindetimiz – ár azamattyń, ásirese jas urpaqtyń tabıǵatqa degen kózqarasyn ózgertý", – dedi QR Ekologıa jáne tabıǵı resýrstar vıse-mınıstri Mansur Oshýrbaev OKQ alańynda ótken baspasóz konferensıasynda.
Bıyl elimiz boıynsha 236 mektepten 12 myńnan astam oqýshy 36 myń tuqym otyrǵyzdy.
1-synypqa qabyldanǵan balalardyń 70%-y qazaq tilde oqýdy tańdaǵan
1 sáýirden bastap 1-synypqa qujat qabyldaý bastaldy.
Oqý-aǵartý mınıstrliginiń málimetinshe, búgingi kúnge deı̆in elimizdiń mektepterine 273 643 bala qabyldandy, olardyń 70%-y memlekettik tilde oqýdy tańdaǵan.
Jyl basynan beri Qazaqstan ekonomıkasy 6,2 paıyzǵa ósti
Qazaqstan ekonomıkasy osy jylǵy qańtar-maýsym aılarynyń qorytyndylary boıynsha 6,2%-ǵa jetip, oń ósimdi kórsetti. Bul týraly Úkimet otyrysynda Premer-mınıstrdiń orynbasary – ulttyq ekonomıka mınıstri Serik Jumanǵarın baıandady.
Bul qarqyn - alǵashqy bes aıǵa qaraǵanda 0,2%-ǵa joǵary jáne keıingi 14 jyldaǵy JİÓ ósýiniń eń joǵary kórsetkishi. Salystyrý úshin, byltyrdyń uqsas kezeńinde ósim 3,2% boldy.