Jetisý aýdany júıeli túrde jańǵyrtylyp, qaýipsiz ári jaıly qalalyq orta qurý baǵytynda naqty qadamdar jasap keledi. Sonyń ishinde syrtqy jaryqtandyrý júıesin jańartý – mańyzdy basymdyqtyń biri. Qalalyq baǵdarlamalardy iske asyrý men ınfraqurylymǵa salynǵan ınvestısıalar nátıjesinde aýdannyń keshki jáne túngi kelbeti aıtarlyqtaı ózgerip jatyr: kóshe men aýlalar, qoǵamdyq oryndar jańa, únemdi jáne birkelki jaryqpen qamtyla bastady. Lázzat Jylqybaeva Almaty qalasynyń Óńirlik komýnıkasıalar qyzmetindegi baspasóz konferensıasynda osylaı dedi.
Qazirgi tańda Jetisý aýdanynda 20 344 jaryq núktesi jumys isteıdi. Onyń ishinde 13 793-i – energıa únemdeıtin LED shamdar, al 6 551-i – eski úlgidegi konsoldi shamdar (JKÝ). 171 syrtqy jaryqtandyrý shkafy (SHÝNO) júıeniń úzdiksiz jumysyn qamtamasyz etip otyr. Ákimniń aıtýynsha, eski shamdardy jóndep, LED shamdarǵa aýystyryp, jaryqsyz qalǵan kóshelerdi jaryqpen qamtý jumystary úzdiksiz júrgizilip jatyr. Qazir 22 kósheni tolyq jaryqtandyryp bitken, taǵy 94 kóshe men ótkelde jumys jalǵasyp jatyr. Barlyǵy 116 ýchaske qamtylǵan.
Energıa tıimdiligi de basty nazarda. Kókjıek, Aınabulaq shaǵyn aýdandarynda, Raıymbek–Súıinbaı–Rysqulov–Stanıslavskıı kóshesiniń sheńberinde eski sarǵysh shamdardy osy zamanǵy LED shamdarǵa almastyrdy. Bul jaryq sapasyn jaqsartyp qana qoımaı, energıa shyǵynyn azaıtýǵa, ekologıalyq áserdi tómendetýge múmkindik berdi.
Sonymen qatar, syrtqy jaryqtandyrýdy keńeıtýge baǵyttalǵan eki iri joba iske asyrylyp jatyr. Birinshisi – 33 kósheni qamtysa, ekinshisi – 11 ýchaskedegi trotýarlar men saıabaqtarǵa baǵyttalǵan. Bul jobalar aıasynda 66 shaqyrym kabel, 824 jaryq tireýi, 1 300 sham jáne 2 900 torsher ornatý josparlanǵan. Bul óz kezeginde aýdandaǵy negizgi kósheler men demalys aımaqtarynyń qaýipsizdigin arttyrady.
Qalanyń estetıkalyq kelbetin jaqsartý da mańyzdy baǵyttyń biri. Qazirgi ýaqytta Jetisý aýdanynda arhıtektýralyq-fasadtyq jaryqtandyrý jobasy qolǵa alyndy. Birinshi kezeńde 29 ǵımarat, onyń ishinde 9 áleýmettik nysan men 20 kópqabatty turǵyn úı jaryqtandyrylady. Bul joba keshki jáne túngi ýaqytta aýdanǵa erekshe kórik berip, onyń tartymdylyǵyn arttyrady.
Jalpy alǵanda, jaryqtandyrýdy damytý boıynsha júrgizilip jatqan keshendi sharalar Jetisý aýdanyndaǵy 200 myńǵa jýyq turǵynnyń ómir súrý sapasyn jaqsartýǵa, sondaı-aq aýdandy jańa, qaýipsiz ári úılesimdi qalalyq keńistikke aınaldyrýǵa baǵyttalǵan.