Qostanaı oblysynda «Kitap oqıtyn ult» jobasyna 55 myńnan astam turǵyn belsendi qatysyp jatyr. Oqyrmandar kóshin mektep oqýshylary bastap tur – olardyń sany 30 703-ke jetti. Bul jas urpaqtyń kitap oqýǵa degen qyzyǵýshylyǵynyń joǵary ekenin aıqyn kórsetedi. Eń belsendi aımaq – Qostanaı qalasy: qala mektepterinen 6418 oqýshy tirkelgen. Odan keıingi oryndarda Rýdnyı qalasy (4788), Áýlıekól aýdany (3112), Qostanaı aýdany (2501) jáne Jitiqara aýdany (2195) tur. Basqa qalalar men aýdandardyń oqýshylary da jobaǵa belsendi túrde qosylǵan.
«Kitap oqıtyn áýlet» baǵyty boıynsha oblysta 10 122 otbasy tirkeldi. Otbasylyq oqý dástúri – urpaqtar sabaqtastyǵynyń jarqyn kórinisi.
«Kitap oqıtyn pedagog» baǵytynda 11 047 muǵalim qatysýda. Jobaǵa bilim berý uıymdarynyń basshylary da belsendi atsalysyp jatyr: 434 dırektor jáne 277 dırektor orynbasary kitap oqýǵa nıet bildirdi.
«Kitap oqıtyn kolej» baǵytynda oblystyń 33 kolejinen 2028 stýdent tirkelgen.
«Kitap oqıtyn memlekettik qyzmetshi» baǵytynda 300-den astam adam qatysyp jatyr. Aýdan jáne qala ákimderi apparattarynyń, basqarma qyzmetkerleriniń qatysýy joǵary. Erekshe kózge túskeni – Fedorov aýdany: 12 aýyldyq okrýg ákimi jáne 18 bólim basshysy tirkelgen. Rýdnyı qalasynan – 15, Qarabalyq aýdanynan – 9 aýyl ákimi, Amangeldi aýdanynan – 5, Qarasý aýdanynan – 3 aýyl ákimi jobaǵa qosyldy. Basqarma basshylarynyń orynbasarlary men qala ákiminiń orynbasarlary da qatysýda.
«Kitap oqıtyn ýnıversıtet» baǵytynda oblystyń 6 joǵary oqý ornynan 1008 stýdent tirkelgen.
Qatysýshylardyń pikiri:
Qostanaı qalasy №31 mekteptiń bastaýysh synyp muǵalimi Qymbat Sultanova:
«Bul jobaǵa qatysý men úshin kásibı mindet qana emes, shynaıy qushtarlyq. Oqıtyn muǵalim – bilimdi muǵalim. Jańa ádistemeler men psıhologıalyq-pedagogıkalyq eńbekterdi oqı otyryp, sabaq berý sapasyn arttyramyz. Muǵalimniń qolyndaǵy kitap – oqýshylar úshin eń úzdik úlgi ári kúshti motıvasıa. Qazir Orynsha Qarabalınanyń “Ustaz baqyty” kitabyn oqyp jatyrmyn. Bul shyǵarma ustazdyqtyń rýhanı jáne praktıkalyq qyr-syryn qaıta ashqandaı áser qaldyrady».
Meńdiqara aýdany Jangeldi aýylynyń turǵyny, «Kitap oqıtyn áýlet» baǵytynyń qatysýshysy Erlan Júrsinuly Aısaǵalıev:
«Jasym 56-da. Bala kezimizden kitapqa jastyq bolyp óstik. “Abaı joly”, “Altyn Orda”, “Kóshpendiler”, “Qyzyl jebe”, “Volokolam tas joly” sıaqty týyndylarǵa jas kúnimnen qanyqpyn. Búginde de oqýdan qol úzbeımin. Jobaǵa otbasymmen birge qýana tirkeldik. Eń úlken jeńis – urpaq sanasyna sińetin rýhanı nár. Kitap oqyǵan ult árdaıym ozady».
Qostanaı oblysy ákimdigi Qoǵamdyq damý basqarmasynyń bas mamany Araılym Ismaǵulova («Kitap oqıtyn memlekettik qyzmetshi» baǵyty):
«Joba týraly estigen boıda qatysýǵa sheshim qabyldadym. Balalyq shaǵym kitap oqýmen ótti. Tizimde Abaıdyń qara sózderi, qazaq klasıkasy, memleket basqarý, álemdik saıasat, psıhologıa taqyrybyndaǵy eńbekter bar. Osy ýaqytqa deıin 4 kitapty aıaqtadym, qazir Nıkkolo Makıavellıdiń “Ámirshi” traktatyn oqyp jatyrmyn. Keıbir kitaptardy arnaıy satyp aldym – olar joba aıaqtalǵannan keıin de qundylyǵyn joǵaltpaıdy».
2025 jyldyń qyrkúıeginde «Kitap oqıtyn ult» jobasy pılottyq túrde Qostanaı, Qaraǵandy oblystary men Shymkent qalasynda bastaý alǵan bolatyn. Qazirgi tańda úsh óńirde jobaǵa 189 myńnan astam adam qatysýda, joba qorytyndysy 2026 jylǵy sáýirde shyǵarylady.
«Kitap oqıtyn ult» Qostanaı oblysy boıynsha jobalyq ofıs, tel: Zańǵar Sanaı 87013435594,
Jansaıa Sandybekova 87477302695.