Kíshí Araldyń suynyń kólemín aıtarlyqtaı kóbeıtuge múmkíndík bolady. Būl turaly Memleket basshysy Qasym-Jomart Toqaev Qyzylorda qalasynda ótíp jatqan Ūlttyq qūryltaıdyń V otyrysynda aıtty, - dep habarlaıdy Aqshamnews.kz.
- Ótken ǵasyrdyń ortasynda adamzat balasy alǵash ret Baıqońyrdan ǵaryshqa attanǵany búkíl álemge belgílí derek. Ūly Jíbek jolynyń boıyndaǵy tarıhı ólke jańa dáuírde de oıdaǵydaı damuda. Qyzylordaǵy kelíp tūryp Aral máselesíne toqtalmaı ketu múmkín emes. Araldy qūtqaru barsha adamzat úshín álí de óte ózektí míndet. Men būl másení halyqqa Joldauymda aıttym. Jyldar boıy júrgízílgen jūmystyń arqasynda Soltústík Araldy qūtqaryp qaldyq. Qashqan teńíz qaıtyp, Kíshí Araldyń qalpyna kele bastaǵanyna bíraz jyl boldy, - dedí Qasym-Jomart Toqaev.
Prezıdenttíń aıtuynsha, qazír Kókaral bógetín bıíktetu sharalary qolǵa alynyp jatyr. Joba osy jyldyń sońynda bastalady.
- Kíshí Araldyń suynyń kólemín aıtarlyqtaı kóbeıtuge múmkíndík bolady. Bíraq, būl tek bízdíń qolymyzda tūrǵan másele emes. Qazaqstandaǵy írí ózenderdíń kóbí bastauyn kórshí elderden alady. Darıyanyń basynda tūrǵan elderdíń su sayasatyna baılanysty Syrdyń suy teńízge ár kezde ártúrlí kólemde jetedí, - dedí Memleket basshysy.
Qasym-Jomart Toqaevtyń paıymynsha, kóptegen túıtkíldí sheshu sheber dıplomatıyaǵa baılanysty.
- Qazír Ortalyq Azıya elderíníń bárímen su resurstaryn bírlese paıdalanu turaly kelísímder jasaldy. Túptep kelgende Aral ǵana emes, Kaspııdíń, Balqashtyń, Ertístíń taǵdyryn sheshu úshín kórshílermen mámílege kelíp, kelísímderge qol qoyuymyz qajet. Su elímíz úshín strategıyalyq resurs, - dedí Prezıdent.