Áleumettík jelíde futbol jeıdesín ūmytyp kettím dep, ákesín ūzaq joldan qaıta artqa qaıtarǵan balaqaıdyń áreketí kóptí du kúldírdí. 2-synyp oqıtyn Dımashtyń ákesí Baqytjan Ermahanov ūlynyń áreketín vıdeoǵa túsíremín dep, bír kúnde jelí jūldyzyna aınaldy. Onyń júktegen beınesí bírneshe mıllıon qaralym jınaǵan. Aqshamnews.kz tílshísí "jyldyń eń meıírímdí adamy" ataǵyna laıyq dep tanylyp jatqan azamatpen tíldestí.
Qyzylordanyń tumasy, qazír Astana mańyndaǵy Talapker auylynda tūratyn ánshí, asaba Baqytjan Ermahanovty jelídegí hıt vıdeo arqyly kópshílík tanyp qaldy. Búgínde jūbaıy Aınūr ekeuí tórt balany tárbıelep ósíríp otyr.
Mıllıondar kórgen vıdeodaǵy jaıt qalaı boldy?
Jūrttyń ezuíne kúlkí ūyalatqan beınedegí eń kíshí ūly - Dínmūhammed. Ol Astanadaǵy mektepterdíń bírínde futbolǵa qatysady. Dımash pen ákesíníń jūrt tanyǵan vıdeosyna dál osy futbol úıírmesí sebep bolǵan.
"Balamdy futbolynan alyp ketíp, auylǵa jetíp qalǵan edík. Ózím toıǵa asyǵyp tūrǵanmyn. Bír kezde ūlym "áke, futbol jeıdemdí ūmytyp ketíppín" dedí. Dımashtyń kóńílí túspesín dep auylǵa jetíp tūrǵan jerímízden qaıta būrylyp mektebíne bardyq. 22 shaqyrymdy artqa tastap, jetíp baryp, jeıdesín ízdeı bastadyq. Aǵaıyna da habarlasyp sūradyq, tappadyq. Bír kezde Dínmūhammed “áke, ystyqtap kettím” dedí. “Ystyqtasań kúrteńdí shesh, aldyńdy aǵytyp qoı” dep sheshkízíp jatsam, jeıdesí ústínde eken. “áke, ústíme kıíp alyppyn ǵoı” dep tyrqyldap kúldí", – deıdí Baqytjan myrza.
Ekeuí artynsha oqıǵaǵa ábden kúlgen.
"Balamnyń kúlkísín kórgende qalaı ashulanasyń? Ekeumíz jol boıy tyrqyldap kúlíp qaıttyq. Sol sáttí vıdeoǵa túsíríp alyp, júktegen edím", – deıdí ol.
"Habarlamalardan telefonym qatyp qaldy"
Jaı ǵana otbasylyq sát túsírílgen vıdeo áleumettík jelíge júktelgen soń, kútpegen jerden kóp qaralym jınap ketken.
"Vıdeo bírneshe mıllıon qaralym jınapty. Jan-jaqtan bárí jíberíp jatyr. “Hıt bolyp jatyrsyzdar ǵoı” dep te aıtyp jatyr. Ózímíz de rıza bolyp, kúlíp júrmíz. Jazǵan adamnyń kóbí sonsha, habarlamalardan telefonym qatyp qaldy", – deıdí Baqytjan Ermahanov.
Kópshílík ákeníń balasyna ūryspaı, kerísínshe kúle qarap, jaǵdaıdy ázílge būrǵanyna erekshe súısíngen. Kóp píkírde dál osylaı sabyrlyq tanyta bílu kez kelgenníń qolynan kele bermeıtín ís ekení jazylǵan.
Tayaqsyz tárbıe men únemí kúlíp júrudíń qūpıyasy ne?
Baqytjan myrza óte balajan ekenín jáne bala tárbıesínde tayaq qoldanudy artyq sanaıtynyn aıtty.
"Bíz kíshkentaıymyzda tayaq jep óstík qoı. Qazír sol bíz kórmegen meıírímdí balalarymyz kórse deımín. Balany ūryp, qorqytyp tárbıeleuge qarsymyn. Balalarymnyń aldy óz otauyn qūrdy, qazír qoldaǵy ekeuíne barynsha ata-analyq mahabbatqa bólep ósíríp jatyrmyz", – deıdí ol.
Únemí kúlíp júretín Baqytjan myrza ómírlík ūstanymy turaly da oı bólístí.
"Árdaıym kúlíp júru kerek. Kúlkímen ómír jeńílírek qoı. Únemí pozıtıv júrudíń qūpıyasy joq. Janyńdaǵy jūbaıyń jaqsy bolsa, bala-shaǵań aman bolsa, bauyryń bútín, basyń aman bolsa – sonyń ózí úlken baqyt. Sol baqytty sezíne otyryp, kóńíldí júrmeu – qatelík. Sondyqtan ár kúnímízge shúkírlík etíp, únemí kúlíp, kóńíldí júrgenímíz abzal", – deıdí Baqytjan Ermahanov.
