Almaty oblystyq Mindetti áleýmettik medısınalyq saqtandyrý qorynyń fılıaly 2025 jylǵy 29 jeltoqsanda MÁMS jarnalarynyń qaıda túsetini jáne medısınalyq qyzmetterdi paıdalanbaǵan jaǵdaıda olarmen ne bolatyny jóninde túsindirdi, dep habarlaıdy aqshamnews.kz
Qordyń habarlaýynsha, mindetti áleýmettik medısınalyq saqtandyrý (MÁMS) júıesi yntymaqtasqan sıpatta bolyp, jeke jınaq shottaryn qarastyrmaıdy.
"Barlyq jarnalar men aýdarymdar Ulttyq banktegi biregeı arnaıy shotqa túsedi. Sol shottan olar ár aı saıyn MÁMS boıynsha medısınalyq qyzmet kórsetken uıymdarǵa tólenedi. Iaǵnı, qarajat negizinen MÁMS boıynsha emdelgen naýqastar úshin paıdalanylady. Bul ár azamattyń medısınalyq kómek alý kólemin shektemeı qamtamasyz etý úshin jasalǵan, sebebi keıbir medısınalyq qyzmetterdiń quny birneshe júz myńnan mıllıon teńgege deıin jetýi múmkin. Mundaı qyzmetti jeke jarnalar esebinen tóleý múmkin emes, óıtkeni jyldyq eń joǵary jarna kólemi 204 000 teńgeden aspaıdy", – dep túsindirdi fılıal ókilderi.
Jyl sońynda biregeı shotta qalǵan MÁMS qarajattary kelesi jylǵa aýysyp, jyldyń basynda medısınalyq uıymdarǵa aldyn ala tólem retinde jiberiledi.
MÁMS-tiń yntymaqtasqan júıesi – azamattarǵa qor qarajatyn dári-dármek nemese basqa qajettilikterge paıdalanýǵa berilmeıtin sebepterdiń biri. Alaıda bolashaqta ambýlatorıalyq dári-dármekpen qamtamasyz etý sheńberinde dáriler úshin qosymsha tólem engizý josparlanyp otyr.