Temírtauda jasóspírímder qozǵalystaǵy kólík artyna jabysyp, jolda ómírlerín qaterge tíktí.
Qaraǵandy oblysynda kámeletke tolmaǵan úsh balanyń jolda ketíp bara jatqan GAZel avtokólígíne jarmasyp, jol boıymen qozǵalǵan sátí túsírílgen beınejazba áleumettík jelílerde tarady, dep habarlaıdy aqshamnews.kz Polisia.kz-ke sílteme jasap.
Oqıǵa jol qozǵalysy erejelerín óreskel būzumen qatar balalardyń ómíríne eleulí qauíp tóndírgen. Jedel túrde júrgízílgen tekseru nátıjesínde oqushylardyń jeke tūlǵalary anyqtaldy. Olar 10-11 jas aralyǵyndaǵy mektep oqushylary bolyp shyqty. Barlyq bala zańdy ókílderímen bírge polıtsıya bólímíne jetkízíldí. Balalardyń ata-analaryna qatysty bala tárbıesíne nemqūraıly qaraǵany úshín ákímshílík jauapkershílíkke tartyldy.
Atalǵan ís boıynsha materıaldar kámeletke tolmaǵandardyń ísterí jáne olardyń qūqyqtaryn qorǵau jóníndegí komıssıyaǵa joldandy. Sonymen qatar jasóspírímder mektepíshílík esepke alynatyn bolady. Polıtsıya qyzmetkerlerí ata-analarǵa balalarynyń júrís-tūrysyn baqylauda ūstaudyń jáne olardy joldaǵy qauíp-qaterden saqtandyrudyń mańyzdylyǵyn eske salady. Mūndaı nemqūraılyq qaıǵyly jaǵdaılarǵa alyp keluí múmkín.