Memleket basshysy Qasym-Jomart Toqaevtyń Turkistan gazetíne bergen kólemdí sūhbatynda "Qańtar oqıǵasy" turaly sóz qozǵady, - dep habarlaıdy aqshamnews.kz tílshísí.
"Taǵy bír ózektí taqyryp. Qańtar oqıǵasyna qatysqan bírqatar azamatqa baılanysty sot protsesí turaly aqparat BAQ betterínde byltyr ara-tūra jarıyalanyp tūrdy. Tergeu amaldary álí júríp jatyr ma?" degen sūraq qoıyldy.
"Būl taqyrypqa qatysty negízgí mán-jaıdyń bárí áldeqashan belgílí boldy. Sol oqıǵalar boıynsha tergeu júrgízu kezínde qūqyq qorǵau organdary azamattyq qoǵam ókílderímen tyǵyz baılanysta jūmys ístedí. Bírqatar qoǵamdyq komıssıya qūrylyp, oǵan belgílí zańgerler jetekshílík ettí. Mūndaı qadam jūmystyń beıtarap ūstanymmen júrgízíluíne, sol arqyly barlyq oqıǵanyń aq-qarasyn anyqtauǵa múmkíndík berdí. Osy oraıda, azamattyq jauapkershílík tanytyp, kásíbı bílíktílígín kórsetkení úshín olarǵa rızashylyǵymdy bíldírgím keledí. 2022 jylǵy nauryzda Parlamentte arnaıy qoǵamdyq tyńdau ótíp, būl oqıǵaǵa jáne elímízdíń konstıtutsıyalyq qūrylymyn būzbaq bolǵan qylmyskerlerdíń áreketíne egjeı-tegjeılí baǵa beríldí.
Iá, keıbír sot protsesterí, sondaı-aq, qańtarda ūrlanǵan kóptegen qarudy ízdestíru jūmystary álí jalǵasyp jatyr. Sol kúnderí qylmyskerler úsh myńnan asa qaru-jaraqty ıemdeníp ketken edí. Bíraq kúshtík qūrylymdardyń arqasynda qaru-jaraq jasyrylǵan qoımalardyń kóbí tabyldy.
Qańtar oqıǵasyn talqylaıtyndar kóbíne sol kezdegí daǵdarystyń túpkí mánín túsínuge esh paıdasy joq dúnıelerdí qazbalap ketedí. Sol úshín olardy kínálauǵa da bolmas. Degenmen aqıqat jolynda eshqashan qyzbalyqqa salynbau kerek. Almatydaǵy alasapyran turaly jıí aıtylyp jatady, mūny túsínuge de bolady. Bíraq zūlymnyń sıqyrly tayaqshasymen jasalǵandaı adam sengísíz jaǵdaılar bolǵanyn da esten shyǵarmau kerek. Naqtyraq aıtqanda, búlíktí ūıymdastyrushylardyń ámírímen bír mezette on ekí qalada jappaı tártípsízdík beleń aldy. Onyń arty qaskóılerdíń kóptegen oblys ákímdíkterí men qūqyq qorǵau organdarynyń ǵımarattaryn basyp aluyna ákep soqtyrdy.
"Tóńkerís" jasauǵa ábden mashyqtanǵan mamandardyń jetekshílígímen tártípsízdíktí ūıymdastyrushylar Úkímettíń janar-jaǵarmaı baǵasyn ósíru turaly sheshímín jeleu etíp, adamdardy jappaı sheruge shyǵuǵa ıtermeledí. Sosyn azamattardyń, memlekettík qyzmetshílerdíń, bír tańǵalarlyǵy, kúshtík qūrylym qyzmetkerleríníń edáuír bólígíníń arasynda dúrbeleń tuǵyzdy. Olar qaru-jaraq pen qūpıya qūjattardy qarausyz qaldyryp, jūmys oryndaryn tastap, kete bastady. Ūlttyq qauípsízdík komıtetíníń jáne Íshkí íster mınıstrlígíníń keıbír basshylary syn saǵatta Otan aldyndaǵy adaldyǵyn saqtap qala almady, kásíbı deńgeıí de tómen ekenín kórsettí.
Osyndaı jaǵdaı, ásírese, búlíkshílerdíń basty nysanasy bolǵan Almatyda anyq baıqaldy. Áskerı qyzmetshíler men qala tūrǵyndary qatty qorlyqqa ūshyrady. Ákímshílík ǵımarattar, sauda ortalyqtary, dúkender men bankter qırap, órtke oranyp, tonalyp jatty. Mūndaı júgensízdíkke qarsy tótenshe sharalar qabyldau qajet boldy. Qazír, arada bíraz uaqyt ótken soń pıǵyly aram árí sana-sezímí tayaz keıbír adamdar memleketímízdíń eldí qūrdymǵa jíbere jazdaǵan sūmdyq berekesízdíkten aman qalǵany jaıly áńgímení ádeıí aınalyp ótíp, qasaqana oıyna kelgendí aıtyp júr", - dedí Prezıdent.