Almaty oblysynda jantúrshigerlik jol apaty jeti adamnyń ómirin jalmady. Qaza tapqandar qatarynda estý qabileti tómen sportshylar bar. Olar Bishkektegi týrnırden qaıtyp kele jatqan, - dep habarlaıdy aqshamnews.kz tilshisi "KTK" telearnasyna silteme jasap.
"Bul Qazaqstandaǵy estý qabileti tómen sportshylar qaýymdastyǵy úshin óte aýyr jaǵdaı. Óıtkeni kólikte jastar quramasynyń bas bapkeri de bolǵan. Bári de ulttyq quramanyń músheleri edi. Olar Azıa chempıonattarynda júldeli oryndar alǵan tájirıbeli sportshylar bolatyn", - dedi Ulttyq sýrdlımpıada komıtetiniń vıse-prezıdenti Arsen Shakýov.
Qaıǵyly oqıǵa keshe tún ortasynda boldy. Jolaýshyǵa lyq toly mınıven tizgindegen júrgizýshi júıtkip kele jatyp tejeýishin basyp úlgermegen. Sóıtip aldynda kele jatqan júk kóliginiń tirkemesine soǵylady. Soqqynyń qatty bolǵany sonshalyq, jeńil mashınanyń saý-tamtyǵy qalmapty. Kólik júrgizýshisi men alty jolaýshy oqıǵa ornynda til tartpaı ketti. Marqum bolǵan sportshylar Bishkekte ótken ardager fýtbolshylar arasyndaǵy týrnırge qatysqan eken. Polısıa jol apatyna qatysty qylmystyq is qozǵap, tergeý júrgizip jatyr.
"Polısıa qyzmetkerleri Almaty - Bishkek avtojolynyń 129-shaqyrymynda bolǵan jol-kólik oqıǵasy deregi boıynsha qylmystyq is qozǵady. Qazir bolǵan oqıǵanyń barlyq mán-jaıyn anyqtaýǵa baǵyttalǵan sotaldy tergeý amaldary júrgizildi", - dedi Almaty oblysy PD bólim basshysy Ernar Saıdildın.