Almaty oblysynyń ákimi ımamdardy qabyldady.
23 shilde Almaty oblysynyń ákimi Amandyq Batalov Qazaqstan Musylmandar dinı basqarmasynyń ókilderin qabyldady, dep habarlaıdy Almaty-akshamy.kz.
QMDB-nyń Taldyqorǵan óńiri boıynsha ókil ımamy, Taldyqorǵan qalasynyń ortalyq «Iman» meshitiniń bas ımamy Ardaq Orazbaevtyń basqa qyzmetke aýysýyna baılanysty óńirge jańa ókil ımam bolyp Almas Danaǵulov taǵaıyndalǵan bolatyn. Osyǵan oraı QMBD-nyń resmı ókili Nurbek Esmaǵanbetov oblys ákimine burynǵy jáne qazirgi ókil ımamdy bastap kelgen.
«Almaty oblysy - úlken aımaq. Eki mıllıonnan astam turǵyny bar. Biz úshin eń basty baılyq – halyqtyń birligi, tynyshtyǵy. Búginge deıin biz QMDB-nyń Taldyqorǵan óńiri boıynsha ókil ımamy Ardaq Orazbaevpen birlesip jumys jasadyq. Qanshama ıgi ister atqaryldy. Mundaı jumystardy biz aldaǵy ýaqytta da jalǵastyramyz», - dedi Amandyq Batalov.
Jetisýdyń burynǵy ákimi Ardaq Orazbaev kezdesý barysynda qaıyrymdylyq sharalary boıynsha Almaty oblysy aldyńǵy qatarda ekenin aıtty.
«Máselen, «El úlesi - páterge» jobasynyń aıasynda respýblıka boıynsha muqtajdarǵa barlyǵy 737 baspana alyp berilse, sonyń 78-i osy Almaty oblysynda júzege asyryldy. Bul - elimiz boıynsha eń úlken kórsetkish. Aımaqtaǵy ókilderimizdiń ózderińizben birlesip atqarǵan eleýli jumystary áli de jemisin beredi dep oılaımyn»,– deı kele, Ardaq Orazbaevtyń «Ýaqyp» qorynyń prezıdenti laýazymyna taǵaıyndalǵanyn aıtty.
Onyń aıtýynsha, óńirdiń ókil ımamy qyzmetin endi Almas Danaǵulov atqarady.
«Almaty oblysynda 476 musylman meshiti bar. Olarda 578 ımam jumys isteıdi. Atap ótsek, jergilikti búdjet esebinen teologıa mamandyǵyna jyl saıyn 10 bilim granty bólinedi»,– delingen Almaty oblysynyń ákimdigi baspasóz qyzmetiniń habarlamasynda.