Jol erejesín būzǵandardyń íshínde 13 moped pen 3 mototsıkl bar, dep habarlaıdy aqshamnews.kz tílshísí.
Almatyda jol qozǵalysy qauípsízdígín qamtamasyz etu jūmysyna motoqoǵamdastyq ókílderí de qosyldy. Olar polıtsıya qyzmetkerlerímen bírge jeke qūramnyń saptyq taratuyna qatysyp, keıín qala kóshelerínde bírlesken patrulge shyqty.
Bírlesken jūmys jol qozǵalysy qauípsízdígín qamtamasyz etuge baǵyttalǵan reıdtík ís-sharalar kúsheıtílgen kezeńde júrgízílude. Onyń barysynda jol qozǵalysy erejesín būzudyń 213 deregí anyqtalyp, 59 kólík arnaıy aıyp tūraǵyna qoıyldy. Onyń íshínde 13 moped pen 3 mototsıkl bar.
Būl joly profılaktıkalyq jūmysqa óz áríptesterí arasynda bedelge ıe, tájírıbelí mototsıklshílerden qūralǵan motoqoǵamdastyq ókílderí qatysty.
– Bízdíń ūstanymymyz aıqyn: mototsıkldí paıdalanu zań talaptaryna saı, qauípsízdík erejelerín saqtaı otyryp jáne jol qozǵalysynyń basqa qatysushylaryna qūrmetpen júzege asyryluy kerek. Jekelegen júrgízushílerdíń áreketí búkíl motoqoǵamdastyqqa qatysty terís píkír qalyptastyruǵa sebep bolmauy tıís, – dep atap óttí reıdke qatysushylar.
Bírlesken patrul barysynda motoqoǵamdastyq ókílderí mototsıkl júrgízushílerí tarapynan jasalǵan qūqyq būzushylyqtarǵa nazar audaryp, profılaktıkalyq túsíndíru jūmystaryn júrgízdí. Sondaı-aq jol qozǵalysy erejelerín, qauípsízdík talaptaryn saqtau jáne aınaladaǵy adamdarǵa qūrmetpen qarau qajettígín túsíndírdí.
Mūndaı jūmys formaty profılaktıkany polıtsıya tarapynan ǵana emes, motoqoǵamdastyqtyń óz íshínde de júrgízuge múmkíndík beredí.
Almaty qalasy PD ákímshílík polıtsıya basqarmasynyń bastyǵy Ábdínūr Tasybaev jol qozǵalysy qauípsízdígí polıtsıya men jol qozǵalysyna qatysushylardyń ortaq jauapkershílígí ekenín atap óttí.
– Mototsıklshílerdíń joldaǵy qauípsíz mínez-qūlyq mádenıetín qalyptastyruǵa ózderí belsendí qatysqanyn qalaımyz. Motoqoǵamdastyq ókílderí ekí dóńgelektí kólíktí basqarudyń erekshelígín jaqsy bíledí. Sondyqtan qauípsízdík talaptaryn óz áríptesteríne jaqynyraq árí túsíníktírek jetkíze alady. Mototsıkl qaladaǵy qauíp nemese qolaısyzdyq kózí retínde emes, jol qozǵalysynyń qalypty qatysushysy retínde qabyldanuy kerek. Al onyń júrgízushísí zań talaptaryn saqtap, aınalasyndaǵylardy qūrmettep, ózíníń ǵana emes, ózge de jol qozǵalysyna qatysushylardyń qauípsízdígíne jauapty boluy tıís, – dep atap óttí Ábdínūr Tasybaev.