Bıyl festıval 7-shí ret ūıymdastyrylmaq, dep habarlaıdy aqshamnews.kz tílshísí.
25-27 qyrkúıek kúnderí Túrkístan qalasyndaǵy «Keruen saraı» turıstík keshenínde VII Halyqaralyq «Voice of Turan - 2026» qazaq ánderí festıvalí ótedí. Qazaq ánderí festıvalí - qazaq muzykasyn jáne qazaqstandyq avtorlardyń úzdík shyǵarmalaryn halyqaralyq deńgeıde nasıhattaıtyn, Túrkístannyń tarıhı-mádenı kelbetín álemge tanytatyn írí mádenı joba. Bıyl festıval 7-shí ret ūıymdastyrylmaq. Būny Túrkístan oblysy ákímíníń orynbasary Ertaı Altaev OKQ brıfıngínde aıtty.
«Sharaǵa 20 eldíń ónerpazdary qatysady. Qatysushylar Frantsıya, Ispanıya, Italıya, San-Marıno, Tunıs, Venesuela, Indonezıya, Vatıkan, Belarus, Bolgarıya, Tyva, Gruzıya, Armenıya, Meksıka, Marokko, Kuba, Gvıneya, Qarachaı Respublıkasy, Bashqūrtstan jáne Brazılıyadan kelmek», - dedí spıker.
Festıvaldíń basty erekshelígí - sheteldík oryndaushylardyń qazaq ánderín shyrqauy. Joba qazaq muzykasy men qazaqstandyq avtorlardyń shyǵarmalaryn halyqaralyq deńgeıde nasıhattauǵa baǵyttalǵan.
Festıval ayasynda 25 qyrkúıek kúní Túrkí tíldes elderdíń tanymal ónerpazdarynyń qatysuymen «Zhibek zholy áuenderí» auqymdy gala-kontsertí ótedí. Al, 26 qyrkúıekte erekshe kezeńderdíń bírí - «Jūldyzdy jūp» baǵdarlamasy kórermen nazaryna ūsynylady. Būl kúní festıvaldíń saltanatty ashylu rásímí ótíp, sheteldík qatysushylar Qazaqstannyń tanymal óner sheberlerímen bírge qazaq ánderí men zamanauı hıtterdí oryndaıdy. 27 qyrkúıek kúní festıvaldíń «Qazaq ání» kezeńí bastau alady. Qatysushylar qazaqtyń halyq ánderín, qazaq kompozıtorlar shyǵarmalaryn oryndaıdy.