Almaty ákímí Darhan Satybaldy Nauryzbaı audanynda jıyn ótkízíp, oǵan audan ákímdík basshylyǵy, tıístí basqarma men kommunaldyq qyzmet ókílderí qatysty.
Keńes barysynda bírqatar ınfraqūrylymdyq jáne áleumettík nysannyń, sonyń íshínde su jáne káríz jelíleríníń, sondaı-aq mektep qūrylysyna qatysty túıtkíldí máseleler qaraldy. Jūmys qarqynynyń bayaulyǵyna jol bermeu kerektígí erekshe ataldy.
«Búgín kóterílgen barlyq másele hattamaǵa engízílíp, baqylauǵa alynady. Injenerlík jelí, jol men abattandyru basty nazarda tūr. Sebebí būl tūrǵyndardy jıí alańdatatyn jaıttar», – dedí qala ákímí.
Shūǵyla shaǵynaudanyndaǵy magıstraldyq gaz qūbyrynyń qūrylysyna basa nazar audaryldy. Jūmys qarqyny men sapanyń tómendígí, sondaı-aq, kommunaldyq maqsatta qazylǵan jerlerdíń der kezínde kóríktendírílmeıtíní tílge tıek etíldí.
«Qalada míndettemesín oryndamaıtyn, lıtsenzıyalyq talaptardy būzatyn merdígerler sot arqyly jauapsyz dep tanylyp, lıtsenzıyasynan aıyryluy kerek. Bír ret qatań tártíp ornatyp, odan keıín barlyǵy jauapkershílíktí túsínetíndeı jasau qajet. Qalaǵa jūmys ísteuge kelgen árbír kompanıya jūmysyn adal atqaruǵa míndettí», – dedí Darhan Satybaldy.
Halyq sany ósíp jatqan audanda áleumettík nysandardy kóbeıtu de mańyzdy. Jyl sońyna deıín «Keleshek mektepterí» ūlttyq jobasy men ózge de baǵdarlamalar ayasynda 8 myńnan astam oqushyǵa arnalǵan 6 jańa mektep pen qosymsha ǵımarattar paıdalanuǵa beríledí.
Sol kúní ákím tūrǵyndardy qabyldap, sumen jabdyqtau, jol, qoǵamdyq kólíktíń jūmysy, abattandyru, basqarushy kompanıyalardyń qyzmetí jáne qala qūrylysy normalarynyń saqtaluy boıynsha ótíníshterdí qarady. Árbír másele boıynsha túsíndírme berílíp, naqty oryndalu merzímí anyqtaldy.