5 qańtarda Memleket basshysy Qasym-Jomart Toqaev "Turkistan" gazetine bergen suhbatynda áleýmettik jeli adamnyń oılaý qabiletine zıany baryn aıtyp, "jasy qyryqqa jetse de, bilimi men oı-órisi on bes jastaǵy jasóspirimder deńgeıinde qalyp qoıǵan azamattar" baryn atap ótti. Buǵan qatysty psıhologtar ne deıdi? Tolyǵyraq Aqshamnews.kz materıalynda.
Psıholog Olga Romanıvtiń aıtýynsha, áleýmettik jeliniń kesirinen óz ómirin qyzyqsyz dep sanaıtyn adamdarda jiberip alǵan múmkindikter sındromy (FOMO) qalyptasady. Bul kúı ózgelerge qyzǵanyshty kúsheıtedi.
FOMO kezinde adam basqalardyń ne istep júrgenin únemi baqylap, ózin olarmen salystyrýǵa beıim bolady, al bul ózin-ózi baǵalaýdyń tómendeýine ákelýi yqtımal. Psıholog bul sındrom, mysaly, adam dostarynyń keshten ne sapardan salǵan fotolaryn kórgende órshýi múmkin ekenin túsindiredi: áleýmettik jelide kópshilik kúndelikti qarapaıym sátterdi emes, ómiriniń "eń minsiz kelbetin" ǵana kórsetedi. Sonyń saldarynan ınternetten bireýdiń tek jaqsy qyrlaryn kórgen basqa adamdar óz ómirine kóńili tolmaı, túńilip ketýi múmkin.
Eger adam jelidegi ózgeniń ómirin baqylaǵanda qyzǵanysh pen jaısyzdyq týdyratynyn túsinse, vırtýay álemde ótkizetin ýaqytyn qysqartqany jón. Balama retinde tym kóp maqtanatyn adamdarǵa jazylýdan bas tartýǵa bolady. Sondaı-aq, qýanysh syılaıtyn dúnıeler týraly, mysaly, kúndelikke jazyp júrý nazardy óz ishki sezimderine burýǵa kómektesedi.
Psıholog bar nárseniń qadirin bilý mańyzdy deıdi: úı, densaýlyq, otbasy sıaqty qundylyqtardy baǵalaý qajet. Keıde tabys pen qyzyq qýǵan asyǵystyqty báseńdetip, bolyp jatqan sátti tolyq sezinip, ómirdi tereńirek "tushyp" kórý áldeqaıda durys.
"Baıaýlaýdyń jaqsy tásili - sanaly zeıin (maındfýlnes): qazirgi sátte ózińe, sezimderińe jáne áreketterińe nazar aýdarý. Bul shaı daıyndaý nemese asyqpaı tamaqtanyp, onyń dámin seziný sıaqty qarapaıym ádetterden bastalady", - dep túıindeıdi ol.