Budan buryn Qazaqstanda ajyrasý úshin tólenetin baj 80 myń teńgege deıin ulǵaıatynyn habarlaǵanbyz.
Májilis depýtaty Ardaq Nazarov ajyrasatyndarǵa jarna engizýdi usyndy, dep habarlaıdy aqshamnews.kz
Depýtat eldegi ajyrasý deńgeıiniń alańdatarlyq kórsetkishke jetkenin aıtyp, bul máselege júıeli túrde nazar aýdarýǵa shaqyrdy. Ol úkimetke ajyrasýdyń aldyn alýǵa qatysty usynystaryn joldady.
Ol otbasynyń álsireýin ulttyq qaýipsizdik pen memlekettiń turaqtylyǵyna tikeleı qaýip dep baǵalaıdy. Onyń aıtýynsha, bul jaǵdaıdyń aldyn alý úshin túbegeıli ózgeris qajet.
- Shańyraǵynyń otyn-sýyn tasyp júrgen erlerimiz qaıda? Otbasynyń uıytqysy bola bilgen tekti qyzdarymyz qaıda?, – dep depýtat qoǵamǵa ashyq suraq tastaıdy.
USYNYSTAR
1. Ajyrasýǵa memlekettik bajdy arttyrý jáne jarna engizý
Depýtat ajyrasýǵa ótinish berer kezde birjaqty aryzdy qabyldamas buryn mindetti túrde joǵary kólemdegi memlekettik baj engizýdi usynady. Sonymen qatar, ajyrasqandarǵa qatysty tabys salyǵynyń mólsherlemesin kezeń-kezeńimen arttyrý múmkindigin qarastyrýdy usyndy.
2. Aqsaqaldar ınstıtýtyn qaıta jandandyrý
Depýtat burynǵy dástúrge súıene otyryp, jergilikti keńester, ardagerler alqasy, ımamdar men áıelder keńesteri sıaqty konsýltatıvtik qurylymdardy ajyrasý aldyndaǵy erli-zaıyptylarmen tatýlastyrý jumysyna tartýdy usynady.
3. «Jas otbasy» ulttyq baǵdarlamasyn ázirleý
Nazarov jas otbasylarǵa arnalǵan keshendi qoldaý tetikterin qamtıtyn ulttyq baǵdarlama jasaýdy usyndy. Ol mynadaı baǵyttardy qamtýy tıis:
turǵyn úı alýǵa kómektesý;
balaly bolǵanda járdemaqy tóleý;
balabaqshaǵa tegin joldama berý;
turaqty jumysqa ornalasýǵa qoldaý kórsetý;
ıpotekalyq jeńildikter men salyqtyq demalystar qarastyrý.
4. Toı úshin nesıege jol bermeý
Depýtat úılený toılaryna nesıe alý tájirıbesin toqtatý maqsatynda keń kólemdi aqparattyq-ıdeologıalyq naýqan júrgizýdi usyndy. Ol «Qarapaıym toı – berekeli otbasy» degen uranmen ulttyq deńgeıdegi úndeý jarıalap, oǵan qoǵam qaıratkerlerin, din ókilderin, blogerler men BAQ-ty tartýdy jón kóredi.
Nazarovtyń pikirinshe, ajyrasýdy tek eki adamnyń jeke máselesi retinde qaraýǵa bolmaıdy. Bul – ult bolashaǵyna tóngen qaýip. Ol úkimet pen parlamentti bul problemany strategıalyq deńgeıde qarap, naqty ári nátıjeli áreketke kóshýge shaqyrdy.
- Búgin otbasylarymyz shaıqalyp tursa, erteń eldiń irgesi sógiledi. Ulttyq ıdeologıa, tárbıe men áleýmettik qoldaý – ultty saqtap qalatyn basty tetik, – deıdi depýtat.