Izraıl áskerı kúshterí Irandaǵy áskerı nysandarǵa «dál soqqy» jasaǵanyn málímdedí, dep habarlaıdy BBC News.
TsAHAL túngí saǵat 2 shamasynda «Iran rejımíníń Izraılge qarsy tūraqty shabuyldaryna» jauap retínde Irandaǵy áskerı nysandarǵa dál soqqylar jasalǵanyn jarıyalady.
Izraıldíń Iranǵa bergen būl jauaby Tegerannyń 1 qazanda Izraılge jappaı shabuyl jasap, 200-ge juyq ballıstıkalyq zymyran atuynan keıín jasalǵan josparly áreket edí. Būl shabuyl Izraıldíń Beıruttegí «Hezbolla» tobynyń shtab-páteríne jasaǵan soqqysynan qaza tapqan «Hezbolla» jetekshísí Hasan Nasrallanyń ólímíne jauap retínde boldy.
Izraıldíń jauap shabuylynyń tolyq auqymy álí anyqtalmaǵanymen, Izraıldíń qoǵamdyq telearnasy ondaǵan joıǵysh ūshaq Irannyń áskerı nysandaryna soqqy jasaǵanyn habarlady, dep jazdy Reuters.
Irannyń Fars aqparat agenttígí Tegerannyń batysy men ońtústík-batysyndaǵy bírneshe áskerı bazanyń Izraıldíń shabuylyna ūshyraǵanyn rastady.
NBC News jáne ABC News habarlauynsha, Izraıldíń shabuyldaryna energetıkalyq ınfraqūrylym nemese yadrolyq nysandar kírmegen, dep málímdedí ızraıldík sheneuník.
Izraıldíń 12 telearnasynyń málímetíne sáıkes, soqqylardyń negízgí nysanasy – Irannyń qorǵanys ónerkásíbíníń ortalyq áskerı nysandary, sonyń íshínde zymyran zauyttary, ūshqyshsyz ūshaqtardy ázírleu jáne óndíru nysandary, sondaı-aq ballıstıkalyq zymyrandardy ūshyru bazalary boldy.
Irannyń memlekettík telearnasy Tegeran mańynda «kúshtí jarylys» bolǵanyn habarlady.