Ispanıyanyń Viajar turıstík jurnaly Almatyny tau bókterínde ornalasqan jáne qala ortalyǵynan tau shańǵysy trassalaryna jyldam jetuge bolatyn álemdegí bes qalanyń qataryna engízdí. Mūny qalalyq Turızm basqarmasynyń ókílderí aıtty.
Basylymdaǵy maqalada Almaty qysqy árí belsendí turızmge arnalǵan ınfraqūrylymy damyǵan Insbruk (Avstrıya), Grenobl (Frantsıya) jáne Zaltsburg (Avstrıya) syndy tanymal baǵyttarmen qatar ūsynylǵan.
Materıal Viajar jurnaly ókílderíníń Almatyǵa jasaǵan saparynyń nátıjesínde ázírlengen. Atalǵan sapar Almaty Tourism Bureau qoldauymen ūıymdastyrylyp, qonaqtarǵa qalanyń basty turıstík nysandary, tabıǵı kelbetí men mádenı kóríktí jerlerí kórsetílgen.
Ásírese, Shymbūlaq tau shańǵysy kurortyna erekshe nazar audarylǵan. Mūndaǵy aspaly jol qonaqtardy teńíz deńgeıínen 3 myń metrden astam bıíktíkke kóterse, álemdegí eń bıík tauly ashyq mūz aıdyny ornalasqan Medeu keshení de tamsandyrdy. Aspaly jolmen joǵary kóterílu ūmytylmas áser syılasa, qalanyń baı mádenı jáne gastronomıyalyq ómírí Almatyny sayahatshylar úshín būrynǵydan da tartymdy ete túsedí.
1978 jyly qūrylǵan Viajar jurnaly Ispanıyadaǵy eń bedeldí turıstík basylymdardyń bírí sanalady. Sayahatshylarǵa arnalǵan basylym mádenı, belsendí árí tanymdyq turızmge basymdyq beredí. Almaty turaly maqala qalaǵa halyqaralyq deńgeıdegí qyzyǵushylyqty arttyryp, ony jyl boıy sayahattauǵa qolaıly turıstík baǵyt retíndegí mártebesín nyǵaıta tústí.
