Almatyda órt qaupí joǵary mausym 20 qarashada ayaqtaldy. Osyǵan oraı Óńírlík kommunıkatsıyalar qyzmetínde Íle-Alatau memlekettík ūlttyq tabıǵı parkíníń mamandary júrgízílgen profılaktıkalyq ís-sharalar men TJD bólímshelerímen bírlesíp jasaǵan reıdter turaly málímet berdí.
Ormandy qorǵau men órttíń aldyn alu ınjenerí Aqnıet Saǵdoldanovtyń aıtuynsha, ūlttyq parktegí tabıǵı órttí sóndíretín tehnıka men kadr jaǵy tolyq qamtylǵan. Aumaǵynda I jáne II tıptegí stantsıyalar jūmys ísteıdí, olardyń qūramynda 4 orman órt stantsıyasynyń basshysy, 33 órtsóndírushí-ormanshy men 4 radıooperator bar. Jedel áreket etu úshín arnauly tehnıka men kólíkter jūmyldyrylǵan: órt sóndíretín mashınalar, shaǵyn orman saqshysy, traktorlar, su tasymaldaǵyshtar, 34 saqshy avtokólígí men 131 qyzmet jylqysy bar. Janarmaı qory men qūral-jabdyq ta jetkílíktí.
Profılaktıka ayasynda 2025 jyly mynandaı jūmys ísteldí:
• 228,5 shaqyrym kólemínde qarsy órt jolaǵy jańartylyp, jóndeldí;
• 78 shaqyrym qarsy órt beldeuíníń shóbí shabyldy;
• 110 aqparattyq anshlag jańartylyp, jańadan ornatyldy;
• órt qauípsízdígí jónínde 22 870 jadynama taratyldy;
• turıster men demalushylar arasynda túsíndírme jūmysy júrgízíldí.
Almaty men oblystyq TJ departamentterí bírlesíp 1 250 reıd ótkízdí. BAQ-ta orman órtíne jol bermeuge baǵyttalǵan 36 materıal jarıyalandy.
TJD, qūtqaru qyzmetterí, «Qazavıaormanqorǵau», «Qazavıaqūtqaru» men tabıǵatty qorǵau polıtsıyasymen bírlesíp tabıǵı órtterdí joyu kezíndegí ís-qımyldy pysyqtauǵa arnalǵan «Alau-2025» oqu-jattyǵuy ótkízíldí.
«Jyl basynan berí park aumaǵynda 21 orman órtí tírkeldí, órt shalǵan audan 26,9 gektardy qūrap, ekonomıkalyq shyǵyn 524,4 myń teńge bolyp baǵalandy. Órt qauípsízdígí erejesín būzǵany úshín 53 adam jauapqa tartylyp, aıyppūldyń jalpy somasy 12,8 mln teńgení qūrady, onyń 8,9 mln teńgeden astamy óndíríldí», – dep tolyqtyrdy Aqnıet Saǵdoldanov.
Ūlttyq park ókílderí kelgen-ketken adamdardy tazalyq pen tártíptí saqtauǵa shaqyrady.