Almaty aldaǵy jyldary studenttík sporttyń jańa ortalyǵyna aınaluy múmkín. Qala 2026 jyly studentter arasyndaǵy boks boıynsha álem chempıonatyn ótkízuge aldyn ala kelísím aldy. Būl turaly Qazaqstannyń Ūlttyq studenttík sport odaǵynyń prezıdentí Qaırat Zakıryanov búgíngí brıfıngte málímdedí. Onyń aıtuynsha, sheshím 28 qarashada Makaoda ótken Azıattyq unıversıtettík sport federatsıyasynyń Bas assambleyasynda qabyldanǵan.
Zakıryanovtyń aıtuynsha, Makaodaǵy kezdesude halyqaralyq studenttík sportty damytu, óńírlík seríktestík strategıyasy jáne Ortalyq Azıyada jańa jobalardy ílgeríletu máselelerí jan-jaqty talqylanǵan.
«2026 jyly Qazaqstanda studentter arasyndaǵy boks álem chempıonatyn ótkízu jónínde ūsynys bíldírdím. Bastamamyz bírden qoldau tapty. Būl – halyqaralyq unıversıtettík sport ūıymdarynyń elímízge degen úlken senímí», – dedí ol.
FISU prezıdentí Leonts Eder de Almatynyń áleuetíne erekshe toqtaldy.
«Qazaqstan írí halyqaralyq jarystardy ūıymdastyruda úlken tájírıbege ıe. 2017 jyly Almatyda ótken Qysqy Unıversıada eldíń ımıdjíne zor áser etkení álí esímízde. Ol studenttík oıyndardyń búkíl tarıhynda eń úzdígí dep tanyldy», – dedí ol.
Qaırat Zakıryanov sondaı-aq WORLD Boxing ūıymynyń būl bastamaǵa resmı qoldau kórsetetínín atap óttí. Belgílí qazaqstandyq sportshy Gennadıı Golovkın jaqynda osy ūıymnyń basshysy bolyp taǵaıyndalǵan edí. Būl chempıonattyń mártebesín arttyryp, jarystyń halyqaralyq deńgeıdegí yqpalyn kúsheıtedí dep kútílude.
Baspasóz maslıhaty barysynda taǵy bír mańyzdy másele qozǵaldy – 2029 jylǵy Dúnıejúzílík qysqy Unıversıadany Qazaqstanda ótkízu múmkíndígí.
«FISU būl taqyrypty da kóterdí. Bízde Unıversıadany joǵary deńgeıde ótkízu úshín barlyq alǵysharttar bar», – dedí Qaırat Zakıryanov.
Almatynyń 2026 jylǵy studentter arasyndaǵy boks álem chempıonatyn qabyldauy – tek írí sporttyq ís-shara emes, halyqaralyq sením men el ımıdjín nyǵaıtu jolyndaǵy úlken qadam. Eger 2029 jylǵy Qysqy Unıversıada da Qazaqstanǵa berílse, elímízdíń studenttík sporttaǵy rólí jańa deńgeıge kóteríluí múmkín.
Ernūr RYSBAI
