Halyqaralyq áıelder kúní qarsańynda Memleket basshysynyń tapsyrmasyna sáıkes ǵylym salasynda eńbek etíp júrgen ǵalym áıelderge tūrǵyn úı sertıfıkattary saltanatty túrde tabystaldy. Būl bastama – otandyq ǵylymdy damytuǵa úles qosyp júrgen jas ǵalymdardy qoldauǵa baǵyttalǵan mańyzdy qadamdardyń bírí, – dep habarlaıdy aqshamnews.kz tílshísí.
Páter ıegerleríníń qatarynda S.Seıfullın atyndaǵy Qazaq agrotehnıkalyq zertteu unıversıtetíníń oqytushysy, ǵylymı qyzmetkerí Aıym Zeınullına bar. Ol ǵylym salasynda belsendí eńbek etíp, zertteu jūmystarymen aınalysyp júrgen jas ǵalymdardyń bírí.
Aıym Erbolqyzy būl kúnníń óz otbasy úshín erekshe mánge ıe ekenín atap óttí. Onyń aıtuynsha, memleket tarapynan kórsetílíp otyrǵan qoldau jas ǵalymdarǵa jańa múmkíndíkter beríp, ǵylymmen erkín árí tereń aınalysuǵa jol ashady.
«Búgíngí kún bízdíń otbasymyz úshín erekshe mereılí kún bolyp otyr. Memleketímízdíń jas ǵalymdardy jáne ǵylym salasyn qoldauynyń arqasynda bíz páter ıesí atanyp otyrmyz. Būl – bíz úshín úlken qoldau árí zor múmkíndík. Mūndaı qoldau bolashaqta ǵylymı zertteulermen tereńírek aınalysuǵa, jańa nátıjelerge qol jetkízuge úlken jol ashady. Men úshín būl – eńbegímízdíń joǵary baǵalanuy dep bílemín», - dedí ol óz rızashylyǵyn bíldíríp.
Aıta ketu kerek, ǵylymdaǵy áıelderdí qoldauǵa baǵyttalǵan mūndaı bastamalar elímízdegí ǵylymı áleuettíń damuyna, sondaı-aq jas zertteushílerdíń ǵylymǵa degen qyzyǵushylyǵyn arttyruǵa úlken serpín beredí.
