10 shíldede Túrkí mádenıetí jáne mūrasy qorynyń shtab-páterínde Qor apparatynyń basshysy Fahrı Valeoǵlu Gadjıevtíń «Ázerbaıjan men Gruzıya arasyndaǵy qatynastar: dıplomatıyalyq mıssıyalar qyzmetí tūrǵysynan kózqaras (1918–1922 jj.)» atty kítabynyń tūsaukeserí óttí.
Ís-sharanyń ashyluynda sóz sóılegen Qor prezıdentí Aqtoty Raıymqūlova qatysushylardy jyly qarsy alyp, Túrkí mádenıetí jáne mūrasy qorynyń sońǵy jyldary júzege asyrǵan mańyzdy jobalary, halyqaralyq seríktestík baǵdarlamalary jáne jańa bastamalary turaly jan-jaqty aqparat berdí.
Professor Raıymqūlova óz sózínde atalmysh eńbektíń tek tarıhı zertteu emes, sonymen bírge halyqtar arasyndaǵy mádenı baılanystardy nyǵaıtatyn mańyzdy qadam ekenín atap óttí.
«Ázerbaıjan men Gruzıya ózara qūrmet pen strategıyalyq áríptestík negízínde ǵasyrlar boıy qarym-qatynas ornatyp keledí», – dedí Qor basshysy.
Ol sonymen qatar ekí el arasyndaǵy dıplomatıyalyq qatynastardyń tarıhyn zerdeleu arqyly aımaqtyń ortaq mádenı jáne tarıhı mūrasyn tereńírek tanuǵa jol ashylatynyn aıtty. Sóz sońynda ol ázerbaıjandyq dıplomattardy kásíbı merekelerímen qūttyqtady.
Kítapqa joǵary baǵa bergen qatysushylar qatarynda — Halyqaralyq Túrkí akademıyasynyń prezıdentí, akademık Shahın Mustafaev; Ázerbaıjan Respublıkasy Mıllı Májílísíníń deputaty Rızvan Nabıev; Ázerbaıjan Ūlttyq ǵylym akademıyasy Tarıh ınstıtutynyń dırektory, kítaptyń ǵylymı redaktory, tarıh ǵylymdarynyń doktory, professor Kárím Shúkúrov; Ázerbaıjan Respublıkasynyń Túríkmenstandaǵy Tótenshe jáne Ókílettí Elshísí Gısmyat Gezalov; Syrtqy íster mınıstrlígíníń Kadrlar basqarmasynyń basshysy Raman Mamedov; Qorǵanys mınıstrlígíníń ókílí Eldjan Imamverdıev; fılologıya ǵylymdarynyń doktory, professor Badırhan Ahmedlı; tarıh ǵylymdarynyń doktory, professor, eńbek síńírgen ǵylym qaıratkerí Solmaz Tohıdı-Rustamova jáne professor Asıf Gadjıly boldy.
Sóz sóılegender būl monografıyanyń ázerbaıjandyq jáne jalpy túrkí tarıh ǵylymyna qosqan úlesí zor ekenín erekshe atap óttí. Olar sondaı-aq Qor prezıdentí Aqtoty Raıymqūlovaǵa ázerbaıjan dıplomatıyalyq mūrasyna kórsetken qoldauy úshín alǵystaryn bíldírdí. Būl baǵyttaǵy zertteu jūmystaryn jalǵastyrudyń mańyzdylyǵy da basa aıtyldy.
Ís-sharaǵa Ázerbaıjan Respublıkasynda akkredıttelgen dıplomatıyalyq korpus ókílderí, memlekettík organdardyń qyzmetkerlerí, ǵylym men mádenıet qaıratkerlerí, qoǵamdyq-sayası sala ókílderí jáne BAQ ókílderí qatysty.