Sondaı-aq qalada QR-kodtary bar aqparattyq plakattar ornalastyrylǵan, dep habarlaıdy Aqshamnews.kz tílshísí.
Qazaqstan Respublıkasy Qūryltaıy deputattarynyń 23 tamyzda ótetín saılauyna sanauly kúnder qaldy. Almatyda aqparattyq-túsíndíru jūmystary jalǵasuda. Onyń maqsaty — árbír azamatqa dauys beruge qatysuǵa baılanysty eń jıí qoıylatyn sūraqtarǵa uaqytyly jauap aluǵa kómektesu.
Almaty qalasy aumaqtyq saılau komıssıyasynyń tóraǵasy Aıgúl Qalyqovanyń aıtuynsha, megapolıs tūrǵyndaryn kóbíne ózderíníń saılau uchaskesíníń ornalasqan jerí jáne saılaushylar tízímíne engízílgen-engízílmegenín qalaı tekseruge bolatyny qyzyqtyrady.
Búgínde mūny bírneshe jolmen jasauǵa bolady. Eń yńǵaıly tásílderdíń bírí — Almaty ákímdígíníń resmı saıtyndaǵy nemese Qazaqstan Respublıkasy Ortalyq saılau komıssıyasynyń ınternet-resursyndaǵy arnaıy servıstí paıdalanu. Ol úshín jeke sáıkestendíru nómírín (JSN) engízse jetkílíktí. Júıe saılau uchaskesíníń nómírí men mekenjaıyn kórsetedí.
Sonymen qatar qalada QR-kodtary bar aqparattyq plakattar ornalastyryluda. Olardy skanerlegennen keıín azamat elektrondyq servıske ótíp, ózíníń JSN-yn engízu arqyly qajettí aqparatty ala alady. Būdan bólek, 109 bíryńǵaı qalalyq baılanys ortalyǵy arqyly keńes aluǵa bolady.
Daıyndyqtyń taǵy bír mańyzdy bólígí — aty-jóní kórsetílgen shaqyrulardy tabystau. Almaty tūrǵyndaryna tírkelgen mekenjaıy boıynsha saılau uchaskesíníń mekenjaıy men onyń jūmys uaqyty kórsetílgen shaqyrular jetkízíledí. Aumaqtyq saılau komıssıyasynyń málímetínshe, uchaskelík komıssıya múshelerí shamamen 539 myń bíregeı mekenjaıǵa baruy tıís. Almatyda 1 mıllıon 329 myńnan astam saılaushy tírkelgen.
Tūrǵylyqty jerí boıynsha tírkeuí joq azamattar úshín bír kúndík tírkeu tetígí qarastyrylǵan. Dauys beru kúní mūndaı servıs qalanyń 41 saılau uchaskesínde qoljetímdí bolady. Būl qajettí qūjattardy aldyn ala rásímdegen azamattarǵa ózderíníń saılau qūqyǵyn júzege asyruǵa múmkíndík beredí.
7 tamyzdan bastap Almaty tūrǵyndary ózderíníń saılau uchaskesíne baryp, saılaushylar tízímíne engízílgen-engízílmegenín teksere alady. Eger qandaı da bír qatelík anyqtalsa, ony dauys beru kúníne qaldyrmaı, aldyn ala túzetuge bolady.
Densaulyq jaǵdaıyna baılanysty saılau uchaskesíne ózdígínen kele almaıtyn azamattar úshín de arnaıy tártíp qarastyrylǵan. Zańnama olarǵa úıde dauys beru múmkíndígín beredí. Mūndaı qūqyq auyr nauqas otbasy múshesíne kútím jasap otyrǵan jáne osy sebeptí úıden shyǵa almaıtyn azamattarǵa da beríledí.
Úıde dauys berudí ūıymdastyru úshín óz uchaskelík saılau komıssıyasyna aldyn ala júgíníp, tıístí ótínísh beru qajet. Mūny 7 tamyzdan bastap 23 tamyz saǵat 12:00-ge deıín jasauǵa bolady. Ótínísh túskennen keıín dauys beru kúní komıssıya múshelerí saılaushynyń úıíne jyljymaly dauys beru jáshígímen baryp, onyń konstıtutsıyalyq qūqyǵyn júzege asyruyna múmkíndík beredí.
Dauys beru kúní óz eldí mekenínen tys jerde bolatyn azamattardyń saılauǵa qatysu máselesí de ózektí. Mūndaı jaǵdaıda zańnamada esepten shyǵaru kuálígín beru qarastyrylǵan.
Ony 7 tamyzdan bastap 22 tamyz saǵat 18:00-ge deıín tírkelgen jerí boıynsha aluǵa bolady. Osy qūjat arqyly azamat bastapqyda saılaushylar tízímíne engízílgen uchaskesín qospaǵanda, eldegí ís júzínde kez kelgen saılau uchaskesínde dauys bere alady.
Eger jospar ózgeríp, azamat dauys beru kúníne deıín úıíne oralsa, esepten shyǵaru kuálígín ózíníń uchaskesíne tapsyra alady. Osydan keıín ol qaıtadan saılaushylar tízímíne engízílíp, tírkelgen jerí boıynsha dauys bere alady.
Aumaqtyq saılau komıssıyasyndaǵylar qazírgí saılauda elektrondyq nemese qashyqtan dauys beru zańnamada qarastyrylmaǵanyn eske salady. Árbír saılaushy jeke ózí dauys beredí. Zańda belgílengen tártíp boıynsha úıde dauys beru ūıymdastyrylatyn jaǵdaılar būǵan kírmeıdí.
Almatydaǵy barlyq saılau uchaskelerí 23 tamyz kúní saǵat 7:00-den 20:00-ge deıín jūmys ísteıdí. Mamandar saılaushylarǵa óz uchaskesíníń mekenjaıyn aldyn ala naqtylap, tízímde bar-joǵyn tekseríp, qajet bolǵan jaǵdaıda barlyq qajettí qūjattardy uaqytyly rásímdeudí ūsynady. Būl dauys beru kúní tuyndauy múmkín artyq sūraqtardyń aldyn alyp, azamattarǵa ózderíníń saılau qūqyqtaryn kedergísíz júzege asyruǵa múmkíndík beredí.