Qazaqstanda ókpe obyry turaly habardarlyqty arttyru aptalyǵy ayaqtaldy, – dep habarlaıdy aqshamnews.kz tílshísí.
Onkologıyalyq aurularmen kúres jóníndegí Keshendí jospar ayasynda ūıymdastyrylǵan ís-sharalar halyqtyń habardarlyǵyn arttyruǵa jáne ókpe aurularyn erte anyqtauǵa baǵyttaldy. Apta barysynda 1 287 adam onkolog dárígerlerdíń konsultatsıyasyn aldy.
Olardyń íshínde 914 qatysushyǵa keude quysy aǵzalarynyń tómen dozaly kompyuterlík tomografıyasy (TDKT) júrgízíldí.
Aktsıyaǵa Qazaqstan tūrǵyndarymen qatar, shetelde tūratyn otandastarymyz da qatysty. Germanıyadan kelgen ekí qazaqstandyq Qazaqstanda júrgen kezínde aktsıyaǵa qatysyp, medıtsınalyq tekseruden óttí.
Tekseru nátıjesínde 39 adamda (4,3%) ókpede qaterlí úderíske kúdíktí oshaqty ózgeríster anyqtaldy. Atalǵan jaǵdaılardyń barlyǵy ózgerísterdíń sıpatyn naqtylau jáne dıagnozdy verıfıkatsıyalau maqsatynda qosymsha tekseruge jíberíldí.
Sonymen qatar mamandar 70 jaǵdaıda (7,7%) obyraldy ózgerísterdí jáne 433 jaǵdaıda (47,4%) basqa da aurulardy anyqtady.
Qatysushylarǵa qosymsha 218 dıagnostıkalyq zertteu jáne zerthanalyq taldau júrgízíldí.
Aktsıya barysynda onkologtar qatysushylarmen jeke aqparattyq-túsíndíru jūmystaryn júrgízíp, zertteudíń maqsaty men mańyzy, erte dıagnostıkanyń mańyzdylyǵy turaly aıtyp, patsıentterdíń sūraqtaryna jauap berdí. Osyndaı tásíldíń arqasynda bastapqyda tekseruden ótuden bas tartqan kóptegen qatysushy óz sheshímín ózgertíp, zertteuden óttí.
«Apta qorytyndysy tek onkologıyalyq úderíske kúdíktí ózgerísterdí ǵana emes, sonymen qatar odan árí medıtsınalyq baqylaudy qajet etetín obyraldy jaǵdaılar men basqa da aurulardy anyqtauǵa múmkíndík beretínín kórsettí», – dep atap óttí Qazaq onkologıya jáne radıologıya ǵylymı-zertteu ınstıtutynyń radıologıya jáne yadrolyq medıtsına bólímíníń meńgerushísí Jandos Mūqtarūly Amanqūlov.
Erte dıagnostıka aurudy der kezínde anyqtap, qajettí emdí uaqytyly bastauǵa múmkíndík beredí. Sondyqtan joǵary qauíp tobyna jatatyn azamattarǵa tekserudí keıínge qaldyrmaı, dıagnostıkadan ótu qajettílígín dárígermen talqylau mańyzdy.