Almatyda «Taza Qazaqstan» respublıkalyq ekologıyalyq baǵdarlamasy ayasynda ótken jalpyqalalyq senbílík mazmūny tereń, taǵylymy mol ís-sharaǵa aınaldy. Qalalyq bílím basqarmasy bastamashy bolǵan «Tamyrlas: ūrpaqtar sabaqtastyǵy» jobasy «Ūrpaqtar amanaty — jasyl Almaty» ūranymen 5 myńnan astam pedagogty, tárbıeshíní, student pen oqushyny bír maqsatqa jūmyldyrdy, – dep habarlaıdy aqshamnews.kz tílshísí.
Ís-sharanyń negízgí ordasy — Innovatsıyalyq shyǵarmashylyq ortalyǵy. Kóktemgí jańaru men Nauryz merekesíníń shattyqty lebí sezílgen būl jerde erekshe jylylyq pen ruhanı úılesímge toly kórínís qalyptasty. Osynda «Tálímgerler alleyasynyń» írgesí qalanyp, ol aǵa buynnyń parasaty men ómírlík tájírıbesín, jastardyń jígerí men tabıǵatqa degen janashyrlyǵyn toǵystyrǵan sımvoldyq keńístíkke aınaldy.
Merekelík jıyn ásem án men kúmbírlegen kúıge, ūlttyq bı men qazaqy dastarqanǵa ūlasty. Qonaqtarǵa nauryz kóje men bauyrsaq ūsynylyp, senbílík tek eńbek merekesí ǵana emes, eldík pen bírlíktíń, tabıǵatqa janashyrlyqtyń jarqyn kórínísí retínde órbídí.
Ís-sharanyń mánín arttyrǵan erekshe sátterdíń bírí — «Tárbıe taly» atty taǵylymdy estafeta boldy. Būl ıgí bastamaǵa Qazaqstannyń Eńbek Erí Ayagúl Mırazova, eńbek síńírgen ūstaz Tatyana Belousova, ardager pedagogter, jas mamandar men mektep kóshbasshylary qatysty. Aǵa buyn ókílderí jastarǵa ómírlík tájírıbesín bólísíp qana qoımaı, aq batasyn beríp, júrekjardy tílek arnady.
Egílgen árbír tal – taǵylymǵa toly tarıhtyń bír bólshegíne aınaldy. Arnaıy taqtaıshadaǵy QR-kod arqyly tálímgerlerdíń ómír joly men keleshek ūrpaqqa qaldyrǵan ósıetterímen tanysuǵa bolady. Osylaısha alleya ashyq aspan astyndaǵy ruhanı mūraǵa, tálím men tárbıe toǵysqan erekshe bílím keńístígíne aınaldy. Būl bastama «Taza Qazaqstan» ıdeyasynyń tek ekologıyalyq mádenıetpen ǵana shektelmeı, onyń tárbıe, tarıhı jady jáne azamattyq jauapkershílíkpen tyǵyz sabaqtas ekenín aıqyn kórsettí.
— Búgín bíz «Aǵartushylar alleyasynyń» negízín qalap otyrmyz. Būl ūrpaqtar arasyndaǵy baılanysty bekemdeıtín mańyzdy qadam. Jastar tárbıesí — barshamyzǵa ortaq míndet. Bíz bílím men tájírıbeníń sabaqtastyǵyn dárípteı otyryp, aǵash egudí osy qūndylyqtyń belgísí retínde qabyldaımyz. Qalamyz kórkeıíp, jasyl jelekke oranyp, ūrpaǵymyz elge qyzmet eter parasatty azamat bolyp óssín, — dedí Qazaqstannyń Eńbek Erí Ayagúl Mırazova.
— Būl jaı ǵana kógaldandyru sharasy emes, būl tírí tarıh qalyptastyru. Árbír aǵashtyń ıesí bar. QR-kod arqyly oqushylar ūstazdardyń ómír jolymen tanysyp, olardyń ósıetín oqı alady. Būl tsıfrlyq dáuírdegí ruhanı sabaqtastyqtyń kórínísí. Bíz ekologıyalyq mádenıet pen ūstaz eńbegíne degen qūrmettíń qatar júrgenín qalaımyz, - dedí qalalyq bílím basqarmasy basshysynyń orynbasary Sáken Aralbaev.
«Tamyrlas» jobasy bír ǵana alańmen shektelmedí. Almatydaǵy mektepterde, balabaqshalarda jáne kolledjderde aumaqtardy kórkeıtu, kógaldandyru jūmystary qarqyndy júrgízíldí. Ūstazdar men oqushylar bírlesíp, aınalany kórkeıtíp, aǵash pen gúl ektí. Osy arqyly olar eldegí ekologıyalyq mádenıettí qalyptastyruǵa, «Taza Qazaqstan» baǵdarlamasynyń qūndylyqtaryn dárípteuge úles qosty.