Májiliste tanystyrylǵan jańa zań jobasy bala kútimi kezeńindegi quqyqtyq teńsizdikti joıýdy kózdeıdi, dep habarlaıdy aqshamnews.kz
Eger túzetýler qabyldansa, úsh jasqa deıingi bala kútimimen úıde otyrǵan ákelerdiń de bul ýaqyty eńbek ótiline qosylmaq.
Búgin Májilistiń jalpy otyrysynda depýtat Asqat Aımaǵambetov birqatar áleýmettik ózgeristerdi qamtıtyn zań jobasyn tanystyrdy. Onyń aıtýynsha, qoldanystaǵy júıede úsh jasqa deıingi bala kútimimen úıde otyrǵan jumyssyz analardyń bul kezeńi eńbek ótiline esepteledi. Alaıda dál osyndaı quqyq ákelerge berilmeı kelgen.
Depýtat osy olqylyqty joıýdy usynyp otyr. Zań jobasy qabyldanǵan jaǵdaıda, bala kútimimen otyrǵan ákelerdiń ýaqyty da resmı eńbek ótili retinde moıyndalatyn bolady. Aımaǵambetovtyń aıtýynsha, bul ózgeris tek áleýmettik ádilettilikti qamtamasyz etip qana qoımaı, otbasyndaǵy rólderdiń teńdigin nyǵaıtady.
"Bul – tek tehnıkalyq túzetý emes. Ádildikke jasalǵan mańyzdy qadam. Otbasylyq jaýapkershilikti teń dárejede qalyptastyrý úshin qajet shara", dedi depýtat.
Ol áriptesterin zań jobasyn birinshi oqylymda qoldaýǵa shaqyrdy.