Eńbekmıni proaktıvti qyzmetterdi jeńildetedi
QR Eńbek jáne halyqty áleýmettik qorǵaý mınıstrligi proaktıvti formatta, ıaǵnı avtomatty túrde, azamattyń qatysýynsyz kórsetiletin memlekettik qyzmetterdi kórsetý prosesine reınjınırıng júrgizedi, dep habarlady Almaty-akshamy.kz. QR Eńbek jáne halyqty áleýmettik qorǵaý mınıstrliginiń taratqan habaryna silteme jasap.
«Ótken jyldyń qorytyndysy boıynsha, proaktıvti formatta memlekettik qyzmetterdi kórsetýmen tómen qamtý atap ótildi. Buryn SMS-dıalog kezinde kórsetiletin qyzmetti alýshylarǵa eki SMS-habarlamaǵa jaýap berý qajet bolatyn, birinshisi qyzmetti alýǵa kelisim bolǵan. Memlekettik qyzmetterdi proaktıvti túrde alǵan adamdardyń sanyn arttyrý úshin kórsetiletin qyzmetti alýshymen dıalog kezinde SMS sanyn ekiden bireýge deıin qysqartý týraly sheshim qabyldandy. Bir SMS-habarlamadaǵy saýalǵa jaýap berý arqyly qyzmet kórsetý bankin tańdaýdy rastaý alynady, bul proaktıv arqyly memlekettik qyzmetti kórsetýge avtomatty kelisim bolyp tabylady», – dedi QR Eńbek jáne halyqty áleýmettik qorǵaý vıse-mınıstri Erbol Ospanov.
Aǵymdaǵy jylǵy 1 maýsymnan bastap jeńildetilgen formatta «Bala týýǵa baılanysty jáne bir jasqa deıingi bala kútimi boıynsha járdemaqylar taǵaıyndaý» qyzmeti kórsetiledi. Nátıjesinde proaktıvti túrde sátti kórsetilgen qyzmetter sany 10%-dan 37%-ǵa deıin artty. Jyl sońyna deıin bul kórsetkishti 50%-ǵa deıin jetkizý josparlanyp otyr.
Budan basqa, avtomatty túrde aqparat almasý maqsatynda ekinshi deńgeıdegi banktermen jáne «Qazposhta» AQ-men ıntegrasıalyq ózara is-qımyl esebinen onlaın rejımde azamattar úshin bar bank shotyn rastaý nemese ashý boıynsha prosesti ońtaılandyrý júrgizilýde.
Sondaı-aq, jyl sońyna deıin birqatar proaktıvti qyzmetterdi ońtaılandyrý josparlanýda:
– jumysynan aıyrylǵan jaǵdaıda tólenetin áleýmettik tólemdi taǵaıyndaý;
– asyraýshysynan aıyrylǵan jaǵdaıda tólenetin áleýmettik tólemdi taǵaıyndaý;
– asyraýshysynan aıyrylý boıynsha memlekettik áleýmettik járdemaqyny taǵaıyndaý;
– eńbek etý qabiletinen aıyrylǵan jaǵdaıda beriletin áleýmettik tólemdi taǵaıyndaý;
– múgedektigi boıynsha memlekettik áleýmettik járdemaqy taǵaıyndaý;
– «Altyn alqa», «Kúmis alqa» alqalarymen marapattalǵan nemese buryn «Batyr Ana» ataǵyn alǵan, «Ana dańqy» ordenderimen marapattalǵan kóp balaly analarǵa memlekettik járdemaqy taǵaıyndaý.