Jūmystaǵy shamadan tys júkteme men bírsaryndy tírshílík – adamdardyń kúızelíp, emotsıyalyq sharshauǵa ūshyrauyna sebep bolatyn basty faktorlardyń bírí. Būl jaǵdaıdyń alǵashqy belgílerí – únemí sharshau, ūıqysyzdyq, mazasyzdyq pen alańdaushylyq.
Osyndaı kúıden shyǵudyń tıímdí joldarynyń bírí – hobbı. Psıhologtardyń píkírínshe, hobbı – mahabbatty, eńbektí jáne oıyndy bír arnaǵa toǵystyra otyryp, adamǵa ruhanı tepe-teńdík syılaıdy. Būl turaly Aqshamnews.kz tílshísí keńírek tarqatyp kórdí.
Suret: sportishka.com, maxmassage.ru, arıt.rf
Hobbı mentaldy saulyqqa qalaı áser etedí?
Nature Medicine jurnalynda jarıyalanǵan zertteu nátıjesí boıynsha, hobbıí bar adamdar depressıyaǵa sırek ūshyraıdy jáne ómírden lázzat aluǵa beıím keledí. Ǵalymdar 65 jastan asqan 93 myńnan astam adamnyń ómírín bírneshe jyl boıy baqylap, hobbı mıdyń belsendílígín arttyryp, tūraqty psıhıkalyq densaulyq pen joǵary ónímdílíkke yqpal etetínín anyqtaǵan.
Taǵy bír zertteude (Discovery Inc.) hobbı adamdarǵa belgísízdík aldyndaǵy qorqynyshty jeńuge kómektesetíní aıtylǵan. Hobbı mynadaı oń áser beredí:
1. Ómírdí baqylauda ūstau
Hobbıí joq adamdardyń tek 17%-y ǵana óz ómírín baqylauda ūstap otyrǵanyn aıtsa, hobbıí barlardyń būl kórsetkíshí – 23%, al qyzyǵushylyǵy óte joǵary jandarda – 26%. Būl kóbíne adamnyń bír salada jaqsy damyǵan daǵdylary men bílímíne baılanysty.
2. Óz-ózíne degen senímdílík
Hobbıí bar adamdardyń 43%-y óz sheshímíne senímdí. Būl sením uaqytty tıímdí basqarumen de tíkeleı baılanysty. Hobbıí bar adam uaqytyn josparlauǵa da beıím.
3. Motıvatsıya men ómír mání
Saualnamaǵa qatysqan adamdardyń 90%-dan astamy hobbı olarǵa shabyt pen ómírge degen qūshtarlyq syılaıtynyn aıtqan.
4. Qoǵammen baılanys
Respondentterdíń 60%-y hobbı arqyly jańa dostar tapqanyn jáne áleumettík sheńberíníń keńeıgenín jetkízgen.
5. Baqyt pen optımızm
Hobbıí bar adamdar ómírge oń kózqaraspen qarap, ózín baqyttyraq sezínedí.
Hobbı tańdaǵanda nege mán beru kerek?
Hobbıdí belsendí jáne passıvtí dep ekí topqa bóluge bolady.
Belsendí hobbı: sport, fıtnes, bı, ıoga, sayahat, foto-vıdeo túsíru, balyq aulau.
Passıvtí hobbı: kítap oqu, kulınarıya, tígínshílík, úı januarlaryna kútím, úı ósímdíkterí, tíl úırenu, dızaın, qolóner.
Būl oraıda aıta ketetín bír keńes, eger jūmysyńyz bírsaryndy bolsa, qozǵalysty qajet etetín hobbı tańdaǵan jón. Al kúndelíktí belsendí jūmys ísteseńíz, kerísínshe, tynysh, shyǵarmashylyqpen aınalysatyn hobbı kómektesedí.
Stereotıpterge baǵynbaǵan jón
Kópshílík hobbıdí «erlerge» jáne «áıelderge» tán dep bólíp jatady. Psıhologtar būl qate kózqaras ekenín aıtady. Hobbıdíń jynysy bolmaıdy – bastysy, adamnyń ózíne ūnauy. Óz qyzyǵushylyǵyńyzdy erkín tańdau – būl íshkí erkíndík pen senímdílíktíń belgísí.
Qaıda baruǵa bolady?
Hobbıge arnalǵan úıírmeler men kurstar jaıly aqparatty ınternetten, áleumettík jelílerden, jergílíktí mádenıet ortalyqtarynyń saıttarynan tabuǵa bolady.
Dostaryńyz nemese tanystaryńyzdan sūrap kóruge bolady – olardyń arasynda sízge baǵyt-baǵdar bere alatyndar tabylyp qaluy múmkín.
Bastaǵan ístí tastap ketpegen dūrys
Jańa nárse úırenu – mıǵa júkteme túsíretíndíkten, adamda bárín tastap ketkísí keletín sátter bolady. Būǵan jol bermes úshín:
• Kíshkentaı qadamdardan bastau qajet;
• «2 mınut erejesí»: jańa ermektí bastaǵyńyz kelmese de, ózíńízge «tek 2 mınut aınalysamyn» dep uáde beru;
• Kúntízbege uaqyt belgílep qoyu;
• Qoldau bíldíretín orta tabu;
• Progrestí trekermen belgílep otyru;
• Nátıje úshín emes, protsesten lázzat alu úshín aınalysu;
• Qymbat qūral-jabdyqty bírden almaı, bastapqyda tegín resurstarmen bastau.
Eger ekí-úsh apta ótkennen keıín de hobbı qyzyqsyz bolyp kórínse — jańa nárse baıqap kóruge bolady. Būl — qalypty protsess.
Hobbıdí taǵy bír «jūmysqa» aınaldyrmańyz
Hobbı erkíndík syılauǵa tıís.
Ony naqty jospar, maqsat, tabys kózíne aınaldyrǵan kezde mı ony jūmys retínde qabyldaı bastaıdy. Sodan keıín kúızelís qaıta oraluy múmkín.
Hobbı — adamnyń ózíne arnalǵan keńístígí. Sol úshín ony keste boıynsha emes, kóńílmen jasaǵan jón.
Hobbı kómektespeı jatsa, mamanǵa júgíníńíz
Eger hobbı jūmystan bas aluǵa kómektespese, janǵa rahat syılamasa, būl adamnyń kúızelís deńgeıíníń joǵary boluy múmkín ekenín ańǵartady. Mūndaı jaǵdaıda:
– Dárumen tapshylyǵy;
– Ūıqynyń būzyluy;
– Psıhologıyalyq qıyndyqtar boluy yqtımal.
Būl máselelerdí anyqtap, sheshu úshín mamannyń kómegíne júgíngen jón.
Hobbı — būl jaı ermek qana emes. Ol — ómírdíń reńín arttyryp, jūmys pen tūrmystyń kúızelísínen aryluǵa kómektesetín myqty qūral. Bastysy — ózíńízge ūnaıtyn ístí tabu jáne ony súısíne oryndau.