Dúnıejúzilik densaýlyq saqtaý uıymynyń dereginshe, «delta» shtammy álemniń 74 elinde anyqtalyp otyr.
"Elordada koronavırýstyń úndi shtammy anyqtaldy", -dedi búgingi Úkimet otyrysynda QR Densaýlyq saqtaý mınıstri Alekseı Soı, dep habarlaıdy Almaty-akshamy.kz.
«Nur-Sultan qalasynda KVI-men aýyrǵan naýqastan alynǵan oń zerthanalalyq úlgige PTR skrınıng júrgizý nátıjesinde «delta» shtammyna nemese úndi shtammyna tán yqtımal mýtasıa anyqtaldy. Koronavırýstyń «delta» shtammy joǵary juqtyrǵyshqa ıe jáne shtamm anyqtalǵan naýqastardyń 60 paıyzynda ol 7 kúnge deıingi barynsha qysqa ınkýbasıalyq kezeńimen erekshelenedi. Taıaýda júrgizilgen zertteýler koronavırýstyń úndi shtammy emhanaǵa túsý jáne ólim-jitimniń joǵary bolýymen baılanysty ekendigin kórsetti», - dedi mınıstr.
Sonymen qatar, onyń aıtýynsha, bul mýtasıany juqtyrǵandarda býyndar men ishtiń qatty aýrýy, estý qabiletin joǵaltý syndy qosymsha sımptomdar tán bolyp otyr.
«Dúnıejúzilik densaýlyq saqtaý uıymynyń dereginshe, SARS-CoV-2 «delta» shtammy álemniń 74 elinde anyqtalyp otyr. Úndi shtammyna tán juqtyrǵyshtyq, aýrýdyń aýyr ótýi syndy málimetterdi eskere otyryp, óńirler dárilik zattardyń jetkilikti qoryn, ókpeni jasandy jeldetý apparatyna arnalǵan shyǵys materıaldaryn, jeke qorǵanysh zattaryn, rezervtik tósek-oryn qoryn qamtamasyz etip, KVI juqtyrǵan naýqastarǵa medısınalyq kómek kórsetý úshin jedel járdem qyzmeti men utqyr brıgadalardy daıyndyqqa keltirýi qajet», - dedi Alekseı Soı.