Jarma aýdanynyń (Abaı oblysy) soty elıtalyq eskort jelisin uıymdastyrǵany úshin sottalǵan bloger Aıka Myrzahmetovaǵa jaza óteýdi eki jylǵa shegerýge sheshim qabyldady, dep habarlaıdy Aqshamnews.kz tilshisi.
Sottyń málimetinshe, Myrzahmetova 2024 jyldyń 21 mamyrynda QK-niń 296-baby 4-tarmaǵy jáne 309-baby 2-bóliginiń 1-tarmaǵy boıynsha 6 jyl 6 aıǵa bas bostandyǵynan aıyrylǵan. Ol jazasyn ortasha qaýipsizdik deńgeıindegi túzetý mekemesinde óteýge tıisti bolǵan.
Zańǵa engizilgen ózgeristerden keıin sottalýshy tarapynan jaza óteýdi shegerý týraly ótinish berilip, ony sot qarady. Sot Myrzahmetovanyń 2020 jyly týǵan jas balasy bar ekenin, oń minezdeme alǵanyn, jeńildetilgen rejımde otyrǵanyn, oryndaýǵa qatysty bereshegi joq ekenin eskerip, QK-niń 74-babyna sáıkes ótinishti qanaǵattandyrdy. Jazanyń ótelmegen bóligi eki jylǵa shegerildi.
Sot sheshimine sáıkes, bul kezeńde Myrzahmetovanyń minez-qulqyn probasıa qyzmeti qadaǵalaıdy.
Eske salaıyq, 2024 jyldyń mamyrynda Almatyda atyshýly «Aıkanyń tizimimen» tanylǵan blogerge 6 jyl 6 aıǵa bas bostandyǵynan aıyrý jazasy taǵaıyndalǵan edi.