Magıstratýrada oqýǵa granttardyń kóp sany pedagogıkalyq mamandyqtar boıynsha qarastyrylǵan – 3 642 grant.
2021-2022 oqý jylynda magıstratýraǵa túsý úshin 13 myńnan astam grant, doktorantýraǵa – 1800-den astam grant bólindi, dep habarlaıdy Almaty-akshamy.kz Bilim jáne ǵylym mınıstrliginiń baspasóz qyzmetine silteme jasap.
Mınıstrliktiń málimetinshe, bilim berý granttary QR Eńbek jáne halyqty áleýmettik qorǵaý mınıstrliginiń derekterine jáne jumys berýshilerdiń suranysqa ıe mamandyqtar týraly aqparatyna sáıkes bólingen. Injenerlik, óńdeý jáne qurylys salalaryna – 3429, jaratylystaný ǵylymdary, matematıka jáne statısıka baǵyty boıynsha – 1278, aqparattyq-kommýnıkasıalyq tehnologıalar boıynsha – 1233, aýyl sharýashylyǵy jáne bıoresýrstar boıynsha – 527 grant bólindi.
Esterińizge sala keteıik, magıstratýraǵa túsý úshin keshendi testileýden ótýge nıet bildirýshilerdi tirkeý 18 maýsymda bastalyp, 15 shildege deıin jalǵasady. Emtıhan 20 shildede bastalady.
«Talapkerlerge yńǵaıly bolý úshin biz testileý nátıjelerimen kelispegen jaǵdaıda apelásıaǵa berý júıesin ózgerttik. Ol elektrondyq formatta ótedi. Endi talapker testileý aıaqtalǵannan keıin 30 mınýt ishinde birden apelásıaǵa ótinish bere alady», – dep habarlady QR Bilim jáne ǵylym vıse-mınıstri Qýanysh Erǵalıev.