Astanadaǵy kópqabatty úılerdíń bírínde jóndeu jūmystary kezínde lıft qūlap, saldarynan lıftke qyzmet kórsetetín kompanıyanyń bír qyzmetkerí qaza tauyp, taǵy ekí adam jaralandy.
Oqıǵaǵa baılanysty zańger Nūrjígít Sūltanbek Jibek Joly telearnasynyń «Búgín LIVE» baǵdarlamasynda píkír bíldírdí, - dep habarlaıdy Aqshamnews.kz.
Zańgerdíń aıtuynsha, qaıǵyly oqıǵa boıynsha jauapkershílík bírneshe tarapqa júkteluí múmkín.
"Būl jerde úsh taraptyń da jauapkershílígí bar dep oılaımyn: lıftíní ornatqan kompanıya, oǵan qyzmet kórsetetín mekeme jáne páter ıelerí kooperatıví. Qazír adam ólímíne baılanysty tergeu júríp jatyr. Qylmystyq kodekstíń 156-baby boıynsha ís qozǵaldy. Tergeu nátıjesínde naqty kínálí tūlǵalar anyqtalyp, tıístí protsessualdyq sheshím qabyldanady", - dedí ol.
Maman jaraqattyń úsh sanaty bolatynyn - jeńíl, ortasha jáne auyr jaraqat, sondaı-aq adam ólímíne ákelgen jaǵdaıdyń zańda jeke qarastyrylatynyn atap óttí. 156-bapqa sáıkes, kínálí dep tanylǵandarǵa 5 jyldan 10 jylǵa deıín bas bostandyǵynan aıyru jazasy qarastyrylǵan.
Sūltanbektíń aıtuynsha, lıft ornatylǵannan keıín onyń qauípsíz paıdalanuyna qyzmet kórsetushí kompanıya tíkeleı jauapty.
«Qyzmet kórsetushí mekeme aqaulardy der kezínde anyqtap, josparly jóndeu jūmystaryn tūraqty júrgízuge míndettí. Sonymen qatar kez kelgen jūmys berushí Eńbek kodeksí boıynsha qyzmetkerleríníń qauípsízdígín qamtamasyz etuí tıís», – dedí zańger.
Ol Qazaqstanda lıft kompanıyalaryn sertıfıkattaıtyn arnaıy organ bar ekenín, dál sol komıtet lıtsenzıya beríp, jyl saıyn tehnıkalyq reglamentke saı tekserís júrgízetínín de atap óttí.
"Tekserísterdí Ónerkásíp jáne qūrylys mınıstrlígímen qatar, jergílíktí atqarushy organdardyń tūrǵyn úı ınspektsıyalary júıelí túrde júrgízuí qajet", – dedí sarapshy.
Zańgerdíń aıtuynsha, eldegí lıftílerdíń 40 paıyzynan astamy tozǵan, olardyń paıdalanu merzímí keı jaǵdaıda 25–30 jylǵa sozylǵan. Al memlekettík standart boıynsha lıftíníń qyzmet etu merzímí - 20 jyl. Astanada 2028 jylǵa deıíngí renovatsıya baǵdarlamasy ayasynda eskí úılerdegí lıftíler men qasbetterdí jańartu josparlanǵan.
