Vaksına alǵan oqytýshylar qosymsha aqy nemese aqyly demalys alady.
Qazaqstandyq joǵary oqý oryndary QR Bilim jáne ǵylym mınıstri Asqat Aımaǵambetovtiń tapsyrmasy boıynsha joǵary oqý oryndarynyń bilim alýshylary arasynda vaksına salýdy qoldaý aksıasyn bastaıdy, dep habarlaıdy Almaty-akshamy.kz.
QR Bilim jáne ǵylym mınıstrliginiń baspasóz qyzmeti taratqan málimetke sáıkes, COVID–19 indetine qarsy ekpe alǵan stýdentter joǵary oqý oryndarynyń múmkindikterine baılanysty oqýǵa, jataqhanalarda turýǵa jeńildikter alyp, túrli syılyqtarǵa ıe bolady.
Osylaısha, joǵary oqý oryndary halyqtyń densaýlyǵyn qorǵaý úshin vaksınalaý qarqynyn kúsheıtý jónindegi jumysty qoldaıdy. Tek stýdentter ǵana emes, sonymen qatar joǵary oqý oryndarynyń ekpe saldyrǵan oqytýshylary da materıaldyq materıaldyq yntalandyrýǵa ıe bolady.
Ál-Farabı atyndaǵy QazUÝ, L.N. Gýmılev atyndaǵy EUÝ, Abaı atyndaǵy QazUPÝ, Q.I. Sátbaev atyndaǵy QazUTZÝ, M. Áýezov atyndaǵy OQÝ, M. Ótemisov atyndaǵy BQÝ, H. Dosmuhamedov atyndaǵy Atyraý ýnıversıteti vaksınalaýdy qoldaý boıynsha aksıalardy bastap ketti.
Birqatar joǵary oqý ornynyń stýdentteri úshin oqýǵa, jataqhanalarda turýǵa jeńildikter, saýyqtyrý shıpajaılaryna tegin joldamalar, tegin tamaqtaný jáne qoǵamdyq kólikti paıdalaný talondary qarastyrylǵan.
Sondaı-aq joǵary oqý oryndary vaksına alǵan stýdentter úshin shet tilderi, kompúterlik saýattylyq jáne kásipkerlik daǵdylardy damytatyn tegin kýrstar uıymdastyrýdy josparlap otyr. Sonymen qatar ekpe saldyrǵan keıbir ýnıversıtetterdiń stýdentteri fıtnes zaldaryna, baseınge, teatrǵa, kınoteatrǵa jáne konsertterge tegin bara alady.
Atalǵan joǵary oqý oryndarynyń oqytýshylary da nazardan tys qalmady. Vaksınalanǵan oqytýshylar qosymsha aqy nemese aqyly demalys alady.
«Joǵary oqý oryndaryn koronavırýstyń elde taralýy alańdatyp otyr. Vaksınasıa máseleleri men onyń sheshilý joldaryn joǵary oqý oryndarynyń ózderi qabyldaıdy. Mınıstrdiń tapsyrmasy boıynsha joǵary oqý oryndary stýdentter men oqytýshylardy vaksına alýǵa shaqyryp, yntalandyrý sharalaryn qabyldap jatyr. Bul aksıa bizdiń azamattardyń sanasyn oıatýǵa kómektesedi dep senemiz. Biz birlese otyryp, qaýipti vırýsty jeńe alamyz jáne karantın múmkindiginshe tez aıaqtalady dep úmittenemiz. Basqa joǵary oqý oryndaryn da vaksına salýdy qoldaý úshin yntalandyrý sharalaryn uıymdastyrýǵa shaqyramyz. Sebebi bul koronavırýstyń taralýyn toqtatýdyń jalǵyz joly», – dep atap ótti Bilim jáne ǵylym vıse-mınıstri Qýanysh Erǵalıev.