Búgín Májílís deputaty Nartaı Sársenǵalıev auyldardaǵy mektepterdíń jabyluyna qatysty premer-mınıstrdíń orynbasary Ermek Kósherbaevqa saual joldady, - dep habarlaıdy aqshamnews.kz tílshísí.
Deputattyń aıtuynsha, bala sanynyń azdyǵyna baılanysty Batys Qazaqstan oblysynda keıíngí úsh jylda 12 bastauysh mektep jabylǵan, al 2024 jyly 4 bastauysh mektep taratylǵan.
"Qazír bír qauíptí tendentsıya bar, auylyndaǵy mektep jabylǵandyqtan basqa eldí-mekenge májbúrlí túrde oquǵa attanǵan oqushylardyń ata-analary da kóshíp jatyr. Al adamy kóshken auyldyń kartadan óshetíní belgílí. Būl Qazaqstanǵa úlken qater tóndíredí, bír ǵana derek aıtaıyn: sońǵy 5 jylda elímízde 194 auyl jabylyp qaldy. Búgíngídeı būıryqtyń būıdasymen kete bersek būl san kóbeıetíní anyq. Sebebí mekteptíń jūmys ístep tūruy úshín belgílengen eń az oqushy sanyna sūraq jetíp artylady. Óıtkení bír óńírde adam kóp, bír óńírde adam az. Sondyqtan bír standartta báríne bírdeı tańu qate. Endeshe atalǵan normatıvterdí qaıta qaraıtyn kez keldí. Sebebí Batys Qazaqstan oblysynyń Reseı Federatsıyasymen shektesetín 8 audanynyń 7-índe bala sanynyń azdyǵyna baılanysty mektepter jabylmaqshy. Normatıvke ózgerís engízbesek taǵy 13 mekteptí tolyq kólemde saqtap qala almaımyz", - deıdí ol.
Sondaı-aq, deputat mynadaı ūsynys aıtty.
"Osyǵan oraı naqty ūsynys: Qazaqstan Respublıkasynyń Bílím jáne ǵylym mınıstrlígíníń 2022 jylǵy 6 mamyrdaǵy №185 "Halyqtyń tyǵyzdyǵyna jáne eldí-mekenderdíń qashyqtyǵyna qaraı bílím beru ūıymdary jelísíníń kepíldík berílgen memlekettík normatıvín bekítu turaly" būıryǵynda kórsetílgen 2.2., 2.3., 2.4. - tarmaqtaryn "erekshe jaǵdaıda degen tírkespen tolyqtyru nemese shekara mańynda ornalasqan mektepter úshín atalmysh tarmaqtarda belgílengen normatıvterdíń shegín azaıtudy ūsynamyn. Áıtpese shekaralyq auyldar mektepsíz qalady, saldarynan el kóshedí, jer ıesíz bolady. Al "bos jatqan jer jau shaqyrady", būl qazaqtyń sózí", - dedí ol.