«Almaty Aqshamy» saıtyna bergen sūhbatynda №180 mektep-gımnazıyasynyń basshysy ayaqtalǵan oqu jylynyń qorytyndylary, oqushylarynyń jetístíkterí jáne tabystyń syry turaly áńgímeledí, – dep habarlaıdy aqshamnews.kz tílshísí.
Almatynyń Alatau audanynda ómír qyz-qyz qaınap jatyr. Mūnda jańa mektepter boı kóteríp, sayabaqtar men skverler abattandyrylyp, zamanauı qoǵamdyq keńístíkter paıda boluda. Alaıda audannyń eń basty baılyǵy – onyń balalary. Audandaǵy bílím beru ūıymdarynyń qatarynda №180 mektep-gımnazıyasy shákírtteríníń jetístíkterímen maqtana alady. Būl rette mektep dırektory Baqytbek Qūsaıynovtyń eńbegí aıryqsha.
«Almaty Aqshamy» saıtyna bergen sūhbatynda mektep basshysy ayaqtalǵan oqu jylynyń qorytyndylary, oqushylarynyń jetístíkterí jáne tabystyń syry turaly áńgímeledí.
– Baqytbek Amangeldíūly, 2025–2026 oqu jyly mektebíńíz úshín óte mazmūndy árí qarbalas jyl bolǵan eken. Qorytyndysyn shyǵaryp ótseńíz.
– Bıylǵy oqu jyly oqıǵalarǵa da, jetístíkterge de toly boldy. Jalpy, Almaty qalasynyń bílím beru júıesí joǵary nátıjeler kórsettí: qaladaǵy bílím sapasy 68,7 paıyzǵa jettí. Al megapolıs qūramasy jaratylystanu-matematıkalyq baǵyt boıynsha eldegí úzdík komanda ataǵyn 24 jyl qatarynan saqtap keledí. Būl nátıjege bízdíń mekteptíń de qosqan úlesí bar.
Qala oqushylarynyń ár besínshísí ǵylymı jáne shyǵarmashylyq baıqaularǵa qatysty. 160 myńnan astam oqushy 2,7 myńnan astam júldege ıe boldy. Būl – Almatyda balalardyń qabíletí men talantyn damytuǵa barlyq jaǵdaı jasalǵanynyń aıqyn dálelí. Bíz de osy ıgí úderísten qalys qalmaı, shákírtterímízdíń múmkíndígín barynsha ashuǵa ūmtylamyz.
– Oqushylaryńyzdyń eń jarqyn jetístíkteríne toqtalyp ótseńíz.
– Mektebímízdíń maqtanyshy – Perızat Aıdar. 11-synyp oqushysy «Mahambet oqulary» baıqauynyń audandyq kezeńínde júldelí orynǵa ıe boldy. Onyń shyǵarmashylyq jetístíkterí qala basshylyǵy tarapynan da joǵary baǵalandy. «Talantty ūrpaq – el bolashaǵy» atty kezdesude oǵan Almaty qalasynyń ákímí atynan Alǵys hat tabystalyp, 300 myń teńgelík sertıfıkat beríldí.
Oqushylarymyz jalpy bílím beretín pánder boıynsha olımpıadanyń qalalyq kezeńínde de joǵary nátıje kórsettí. Maral Seríkqyzy (11-synyp) qazaq tílí men ádebıetí pánínen bírínshí oryn, al Aılın Tíllábek (9-synyp) orys tílí men ádebıetí pánínen ekínshí oryn aldy.
«Zerde» ǵylymı jobalar baıqauyndaǵy jetístíkterímízdí de erekshe atap ótken jón. Būl saıysta bastauysh synyp oqushylarymyz ózderíníń ízdenísí men bílímín kórsettí. Al shyǵarmashylyq baǵyttaǵy «Aqberen» baıqauynda Medına Baqytbek bírínshí dárejelí dıplommen marapattalyp, respublıkalyq kezeńge joldama aldy.
– Al jaratylystanu-ǵylymı baǵyttaǵy jūmystar qalaı júríp jatyr? Qazír būl baǵyttyń mańyzy erekshe ǵoı.
– Alatau audanynda būl baǵytqa aıryqsha mán berílíp otyr. «Keleshek mektepterí» ūlttyq jobasy ayasynda zamanauı bílím beru ūıymdary ashyluda. Mysaly, jańadan paıdalanuǵa berílgen №230 mektep 2 myń oqushyǵa arnalǵan. Mūnda STEM-zerthanalary, robototehnıka, fızıka jáne hımıya kabınetterí bar. Mūnyń barlyǵy bolashaq ınjenerler men ǵalymdardy dayarlauǵa qajettí orta qalyptastyrady.
Bízdíń oqushylarymyz da osy baǵytta óz múmkíndíkterín synap júr. Máselen, Nūrálí Sanat respublıkalyq «Baldauren» ǵylymı jobalar baıqauynda úshínshí oryn ıelendí.
Bíz daryndy balalarmen júıelí túrde jūmys ísteudíń nátıjesí bolatynyn jaqsy túsínemíz. Sondyqtan búkíl qaladaǵy úrdíske saı, STEM pánderí – matematıka, ınformatıka, bıologıya jáne fızıka boıynsha daıyndyq jūmystaryn odan árí kúsheıtetín bolamyz.
– Būl jetístíkterde pedagogıkalyq ūjymnyń úlesí qandaı?
– Pedagogıkalyq ūjym – bízdíń basty tíregímíz. Balany tek bílímmen qarulandyru jetkílíksíz. Eń mańyzdysy – onyń shyǵarmashylyqpen aınalysuyna, ízdenuíne, óz qabíletín erkín tanytuyna múmkíndík beretín orta qalyptastyru.
Mektep pedagogterí kásíbı baıqaularǵa da belsendí qatysady. Altyn Tańatarova «Talantty ūstazǵa – daryndy balalar» baıqauynda úshínshí oryn, al Jadra Ádímanapova Alatau audanynyń «Adal ūstaz» baıqauynda ekínshí oryn ıelendí.
2023 jyly mektebímíz «Almaty qalasynyń úzdík orta bílím beru ūıymy» baıqauynyń laureaty atandy. Būl – jekelegen mūǵalímníń emes, búkíl ūjymnyń júıelí eńbegíne berílgen joǵary baǵa. Eń bastysy, bíz qol jetkízgen jetístíkterímízben toqtap qalmaımyz.
– Jańa oqu jylyna qandaı josparlaryńyz bar?
– Aldaǵy uaqytta olımpıadalyq qozǵalysty odan árí damytyp, mekteptíń materıaldyq-tehnıkalyq bazasyn nyǵaıtamyz. Oqushylardy túrlí deńgeıdegí zıyatkerlík saıystarǵa sapaly daıyndauǵa basymdyq beremíz.
Audanda bílím beru ınfraqūrylymyn jańǵyrtu baǵytynda auqymdy jūmystar júrgízílíp jatyr. Būl bízge balalardyń jaıly, qauípsíz árí shabyttandyratyn ortada bílím alatynyna sením beredí.
Óıtkení daryndy bala – tek tabıǵattyń bergen syıy emes. Ol – ūstazdardyń tynymsyz eńbegíníń, ata-ananyń qoldauynyń jáne bala taǵdyryna beıjaı qaramaıtyn qoǵamnyń ortaq eńbegíníń jemísí.