Jūmys sapary barysynda Almaty ákímí Darhan Satybaldy «Qalqaman» metro beketíníń qūrylysymen, sondaı-aq qoldanystaǵy «Bauyrjan Momyshūly» beketín salynyp jatqan jańa beketpen jalǵaıtyn aralyq aumaqtaǵy jūmystardyń oryndaluymen tanysty.
Ákímge «Bauyrjan Momyshūly» jáne «Qalqaman» beketterí arasyndaǵy sol jaq aralyq tonnel kórsetíldí. Atalǵan tonnel qazírgí tańda tolyq ayaqtalǵan. Tonnel arqyly arnaıy platformada synaq júrísí júzege asyryldy. Tekseru barysynda Darhan Satybaldy oryndalǵan jūmystardyń sapasyn, jol ınfraqūrylymynyń jaı-kúıín jáne tehnıkalyq júıelerdíń jūmysyn kóríp shyqty.
Daıyn aralyq tonnelde qūrylys-montaj jūmystarynyń tolyq keshení atqarylǵan. Onyń íshínde túıíspesíz rels jolyn, jaryqtandyru júıelerín, beınebaqylaudy, órt jáne kúzet dabyldaryn, sondaı-aq ınjenerlík jelíler men drenaj júıesín montajdau jūmystary bar. Barlyq jūmys qauípsízdík talaptary men tehnologıyalyq standarttardy saqtaı otyryp júrgízílgen.
Sonymen qatar oń jaq aralyq tonneldí qazu jūmystary jalǵasuda. Qazírgí tańda josparlanǵan 1 590 metrdíń 1 390 metrí qazyldy. Jūmys táulík boıy júrgízílude. Daıyn bólígínde relster tóselíp, ınjenerlík jelílerdí montajdau jalǵasyp jatyr.
«Qalqaman» beketínde monolıttí qūrylymdardy tūrǵyzu jūmystary ayaqtalu satysynda. Vestıbyulde, platformada jáne tehnıkalyq úı-jaılarda árleu jūmystary júrgízílude, ınjenerlík júıeler ornatylyp, sándík elementterdí montajdau, sondaı-aq jedelsaty jabdyqtary men eskalatorlardy ornatuǵa daıyndyq qolǵa alynǵan. Nysanda 470-ten astam maman jūmys ísteude.
Darhan Satybaldy metrony damytu qalanyń kólík sayasatynyń basym baǵyttarynyń bírí bolyp qala beretínín atap óttí. Óıtkení jerasty kólígí jelísín keńeıtu kólík júktemesín azaıtuǵa jáne qala tūrǵyndarynyń qozǵalys múmkíndígín arttyruǵa tíkeleı áser etedí.
Atalǵan aumaqtaǵy qūrylys-montaj jūmystary 2026 jyldyń bírínshí jartyjyldyǵynda ayaqtalady dep josparlanyp otyr. Odan keıín nysan íske qosu-baptau jūmystaryn júrgízu úshín tapsyrylady.