Almatyda tūrǵyn úı aumaqtaryndaǵy jaryqtandyrudy jaqsartu jáne qauípsíz qala keńístígín qalyptastyru jūmysy jalǵasuda. Qala ákímí Darhan Satybaldy Nauryzbaı audanyna baryp, sáulettík-dekoratıvtík jaryqtandyru jáne kórkeıtudíń jańa nysandaryn qarady.
Alǵash bolyp Shūǵyla shaǵynaudanyndaǵy «Arbat – Ūlyqbek» jańa júrgínshíler aımaǵy tanystyryldy. Joba kórkeıtuge arnalǵan byudjettík baǵdarlamalar (HQB) ayasynda júzege asyrylyp, audan tūrǵyndary úshín qolaıly jáne qauípsíz qoǵamdyq keńístík qalyptastyruǵa baǵyttalǵan.
Aımaqtyń jalpy ūzyndyǵy – 370 metr. Mūnda júrgínshí joldary (2 myń kub. m) jáne velosıped jolaqtary (1200 kub. m), balalar oıyn alańy, basketbol alańy, vorkaut-aımaǵy jáne shaǵyn amfıteatr ornatylǵan. Sondaı-aq shaǵyn sáulettík formalar, kóshe jıhazy, avtomatty suaru júıesí jáne jaryqtandyru elementterí qarastyrylǵan. Kógaldandyru ayasynda 200 írí aǵash jáne 4500 būta otyrǵyzyldy, 30 oryndyq, 30 qoqys jáshígí jáne 28 shaǵyn sáulettík forma ornatyldy.
Almaty ákímí shaǵynaudandardaǵy jergílíktí qoǵamdyq keńístíkterdí damytu mańyzdy ekenín atap óttí.
«Mūndaı aumaqtar tūrǵyndar úshín demalys pen seruenníń, kezdesu men qarym-qatynastyń jaıly árí qauípsíz ortasyn qalyptastyrady. Bíz qalanyń ár audanyn kezeń-kezeńímen kórkeıtudí jalǵastyramyz», – dedí Darhan Satybaldy.
Kelesí nysan – Shūǵyla tūrǵyn úı kesheníndegí sáulettík-dekoratıvtík jaryqtandyru. Jūmystar qala boıynsha qasbetterdí jaryqtandyru baǵdarlamasy ayasynda ístelgen.
Sondaı-aq jaryqtandyru Alatau jáne Sabdenov kóshelerí boıyndaǵy toǵyz tūrǵyn úıge ornatylǵan. Qoldanylǵan zamanauı energıya únemdeıtín jabdyqtar qasbetter men aula aumaqtaryn bírkelkí jaryqtandyrudy qamtamasyz etedí. Mūndaı jobalar túngí uaqytta qauípsízdíktí jáne jaılylyqty arttyrumen qatar, jańa tūrǵyn audandardyń estetıkalyq kelbetín qalyptastyrady.
Jūmys saparynyń sońǵy núktesí Raıymbek dańǵyly boıyndaǵy «Nūrly Dala» tūrǵyn úı keshení boldy. Mūnda da qasbettík jaryqtandyru tolyq ayaqtalǵan. Joba segíz tūrǵyn úıdí qamtıdy, sondaı-aq tıímdí tehnologıyalar qoldanylyp, elektr quatyn únemdep, júıelerdíń ūzaq merzímdílígín qamtamasyz etedí.
Darhan Satybaldy qalalyq keńístíktíń estetıkasy tūrǵyndar jaılylyǵynyń mańyzdy qūramdas bólígí ekenín aıtty.
«Bíz ınjenerlík ınfraqūrylymmen qatar, audandardyń syrtqy kelbetíne de nazar audaramyz. Qasbettík jaryqtandyru qalany zamanauı etedí jáne keshkí Almatyny jandandyrady», – dep atap óttí ákím.
Aralau barysynda qala ákímí audandardy keshendí kórkeıtudí jalǵastyrudy, jobalardyń sapasy men merzímín qamtamasyz etudí, sondaı-aq sáulettík jaryqtandyru júıeleríníń tehnıkalyq jaǵdaıyna baqylaudy kúsheıtudí tapsyrdy.
