Almaty qalasynyń ákimi Darhan Satybaldy jumys sapary aıasynda «Almaty–1» temirjol vokzalyna baryp, nysanda júrgizilip jatqan jańǵyrtý jumystarymen tanysty. Qurylys 1974 jyly salynǵan ǵımarattyń bastapqy sáýlettik kelbetin barynsha saqtaı otyryp júzege asyrylýda. Merdiger uıym jolaýshylar aǵynynyń kóptigi men nysannyń joǵary júktemesin eskerip, zamanaýı antıvandal materıaldardy qoldanýda.
Jańǵyrtylǵan vokzal aýmaǵynda vızıt-ortalyq, mýzeılik ekspozısıa jáne kapsýldik qonaqúı ashý josparlanyp otyr. Bul qyzmet sapasyn arttyrýǵa, týrısik ınfraqurylymdy jaqsartýǵa jáne jolaýshylar úshin qosymsha qolaıly jaǵdaı jasaýǵa múmkindik beredi.
Almaty ákimi vokzaldyń jańǵyrtylýy qala turǵyndary men qonaqtarynyń qaýipsizdigi men jaılylyǵyna tikeleı áser etetin mańyzdy áleýmettik joba ekenin atap ótip, jumystar belgilengen merzimde jáne talapqa saı oryndalýy tıis ekenin aıtty.
«Merzimdi sozý nemese talapty buzý faktilerine jol bergen jaýapsyz merdigerler jaýapkershilikke tartylady. Bizde sapasy tómen jumys úshin lısenzıadan aıyrý tájirıbesi bar. Sondyqtan sizderden tártip, jetkilikti resýrs jáne mindettemelerdi sapaly oryndaýdy kútemiz», – dedi Darhan Satybaldy.
Almaty ákimdigi jańǵyrtý jumystarynyń oryndalýyn ári qaraı da baqylaýda ustaıdy. Jańarǵan vokzal qalanyń zamanaýı, yńǵaıly ári qaýipsiz kólik ınfraqurylymy nysanyna aınalýy tıis.