Kólik júrgize almaıtyny ras pa?
Vaksınasıaǵa qarsy kúresýshiler endi «jaqyn arada ekpe tólqujaty joq adamdar óz kólikterin otaldyra almaıdy, jeke kompúter men basqa tehnıkalyq quraldardy qoldana almaıdy» degen qaýeset taratýda. Muny olar ekpeniń QR kodynyń barymen baılanystyryp otyrsa kerek.
Biraq sarapshylar onyń aqylǵa qonbaıtynyn aıtýda. Habarlamada túsindirilgendeı, QR kod shtrıh-kodtyń jetildirilgen nusqasy. Ádette QR kodty kez kelgen aqparatty oqý úshin qoldanady. Onyń kómegimen, tipti taýar nemese qyzmet týraly derekterdi alýǵa, qujattyń, is-sharaǵa nemese qoǵamdyq kólikke bılettiń túpnusqalyǵyn tekserýge bolady. Vaksınasıa tólqujattarynda da QR kodtyń bary ras. Qazaqstandyq vaksına pasporttarynda da ol qujattyń túpnusqalyǵyn tekserý úshin qyzmet etedi. Eýroodaq elderiniń ekpe tólqujatynda adamnyń qashan, qaıda jáne qandaı vaksınamen egilgeni týraly mańyzdy aqparat berilgen. Bul týraly Eýropalyq komısıanyń resmı saıtynda aıtyldy. Sondaı-aq, QR kodtary oqý qurylǵylaryna zıan keltire almaıdy dep otyr mamandar.
Kovıd-ten emdeıtin shaı bar ma?
WhatsApp messendjerinde shaı COVID-19-dan tez aıyqtyrady degen habarlama taratylýda. Habarlamanyń belgisiz avtory CNN telearnasyna silteme jasaıdy. Biraq CNN resmı saıtynda da, Twitter-de de shaıdyń mundaı qudireti týraly jańalyqtar joq.
Buryn jasyl jáne qara shaıdyń vırýsqa qarsy qasıetteri týraly zertteýler júrgizilgen. Alaıda, olar sýsynnyń aýrýmen kúreste paıdasy men tıimdiligi týraly birjaqty qorytyndyǵa kelý úshin jetkiliksiz. Ásirese, koronovırýs ınfeksıasymen kúreste shaıdan kómek bolady deý oıǵa qonymsyz. Kópshilik arasynda taraǵan jel áńgimeni kásipkerler de paıdalanyp úlgeripti. Olar «shaıdy satyp, aqsha tabamyz» dep, tipti COVID-19-dy emdeıtin ózindik sýsyndar jelisin de iske qosyp úlgergen. AQSH-tyń Azyq-túlik ónimderi men dári-dármekterdiń sapasyn sanıtarlyq baqylaý basqarmasy osyndaı taýarlardy taratatyn kompanıalarǵa hat joldady. Onda: «Sizden aýrýdy jeńildetý, aldyn-alý, emdeý nemese dıagnoz qoıý úshin kez kelgen rastalmaǵan jáne sheshilmegen ónimderdi satýdy toqtatýǵa jedel sharalar qabyldaýdy suraımyz» delingen hatta.
Aýrýdyń aldyn alýǵa baǵyttylǵan jalǵyz durys sheshim - ekpe alý ekenin umytpaıyq!