Bı ónerine arnalǵan ataýly kún 1982 jyly IýNESKO-nyń Halyqaralyq bı keńesiniń bastamasymen bekitildi, dep habarlaıdy almaty-akshamy.kz.
Bul merekeniń 29 sáýirge belgilenýiniń ózindik sebebi bar. Bul kúni fransýz balet bıshisi, teoretıgi, balet ónerinde reforma jasaǵan «zamanaýı bıdiń ákesi» Jan-Jorje Noverre dúnıege kelgen. Mereke búkil álemde atap ótiledi.
Halyqaralyq bı kúni qarsańynda Latvıada XVII halyqaralyq horeografıalyq baıqaý ótti. Baıqaýda Roza Baǵlanova atyndaǵy «Qazaqkonsert» memlekettik akademıalyq konserttik uıymynyń «Gúlder» ansambli ártisteri «Halyq bıi» jáne «Horeograf» nomınasıalary boıynsha laýreat atandy.
Baıqaý 25-28 sáýir aralyǵynda Rıga qalasynda ótti. Oǵan AQSH, Latvıa, Estonıa, Lıtva, Germanıa, Aýstralıa, Ispanıa, Grekıa, Grýzıa, Japonıa, Slovenıa jáne Qazaqstan sıaqty álemniń 12 eliniń bıshileri qatysty.