Jas saqshylar tártíptí saqtauǵa, bílímge ūmtyluǵa, Otanyn súyuge jáne elge adal qyzmet etuge ant berdí, dep habarlaıdy aqshamnews.kz tílshísí.
Bílím kúní BQO Shyńǵyrlau audanyndaǵy L. Qylyshev atyndaǵy mektep oqushylary úshín erekshe jańalyqpen bastaldy. Bílím ordasynda "Jas saqshy" synyby ashylyp, 16 oqushy onyń alǵashqy tárbıelenushílerí atandy.
Saltanatty sharaǵa Batys Qazaqstan oblysy polıtsıya departamentí bastyǵynyń orynbasary Qadyrjan Saǵyn arnaıy qatysyp, jańadan ashylǵan synyptyń tárbıelenushílerímen kezdestí.
– "Jas saqshy" synyby – jaı ǵana bílím alatyn orta emes, tártíptí, jauapkershílíktí, Otandy súyudí jáne elge qyzmet etudí úıretetín mańyzdy mektep. Synypqa esímí berílíp otyrǵan Shákírjan atamyzdyń ómír joly – sender úshín úlken ónege. Otanyn qorǵap, keıín íshkí íster organdarynda el tynyshtyǵyna qyzmet etken azamattyń esímín alyp júru – úlken mártebe árí jauapkershílík. Osy senímge laıyq bolyp, jaqsy oqyp, elge paıdasy tıetín azamat bolyp ósíńder, – dedí ol jas saqshylarǵa.
Shara barysynda oqushylardy "Jas saqshy" qataryna qabyldau jáne saltanatty uáde beru rásímí óttí. Jas saqshylar tártíptí saqtauǵa, bílímge ūmtyluǵa, Otanyn súyuge jáne elge adal qyzmet etuge ant berdí.
Būl – Batys Qazaqstan oblysynda ashylǵan jetínshí "Jas saqshy" synyby. Mūnda oqushylardyń qūqyqtyq sauatyn arttyrumen qatar, olardyń boıynda patrıottyq sezím, jauapkershílík, tártíp jáne azamattyq ūstanym qalyptastyruǵa basymdyq beríledí.
Jańa synypqa Ūly Otan soǵysynyń jáne íshkí íster organdarynyń ardagerí, Shyńǵyrlau audandyq polıtsıya bólímínde ūzaq jyldar qyzmet atqarǵan Shákírdan Gaınutdınovtíń esímí beríldí.
Shákírjan Shamsutdınūly Otan qorǵap, keıíngí ǵūmyryn el tynyshtyǵy men qauípsízdígín qamtamasyz etuge arnaǵan. Ol "Dańq" jáne "Otan soǵysy" medaldarynyń ıegerí.
Saltanatty sharaǵa arnaıy kelgen ardagerdíń ūly Yashnur Shákírjanūly ákesíníń esímí berílgen synyptyń ashyluyna rızashylyǵyn bíldíríp, jas saqshylarǵa sáttílík tíledí.
Endí ardager esímí berílgen būl synyp jas ūrpaqqa tártíp pen otansúıgíshtíktíń, elge adal qyzmet etudíń úlgísín nasıhattaıtyn mańyzdy ortaǵa aınalmaq.