İİM sońǵy ýaqytta ınternette prank jáne ekstremaldy kórinister beınelengen vıdeolar jıi taralyp jatqanyn atap ótti, dep habarlaıdy aqshamnews.kz
- Mundaı oıyndar men qaýipti trúkter áleýmettik jelilerde "haıp" úshin jasalýda. Ókinishke qaraı, "laık pen qaralym úshin jarys" ázil-qaljyń men durys kóńil kóterýdiń sheńberinen shyǵyp ketýde. Avtorlar eshkimge zıan keltirmeıtin kontenttiń ornyna agresıa, arandatý, zorlyq-zombylyq kórsetip, ómirge qaýip tóndiretin áreketterge baryp jatyr. Mundaı áreketter jalpyǵa qaýipti jáne qoǵamdyq tártipti buzady. Jyl basynan beri osyndaı derekter boıynsha 24 adam ákimshilik jaýapkershilikke tartyldy, deıdi İİM resmı ókili Shyńǵys Alekeshev.
Alekeshev naqty mysaldardy keltirdi.
- Mysaly, Astanada blogerler lıft ishinde "máıit" tasyp jáne baltamen shabýyl jasap, vıdeo túsirgen. Bul vıdeo jolaýshylardyń úreıin ushyryp, qatty qorqynysh týdyrdy. Atalǵan qatygez pranktiń barlyq qatysýshylary 15-ten 30 táýlikke deıin ákimshilik qamaýǵa alyndy. Almaty oblysynda ekstremaldy vıdeo túsirý kezinde jas jigit kele jatqan kóliktiń ústinen sekirmek boldy. Ókinishke qaraı, bul áreket qaıǵymen aıaqtaldy — ol aýyr jaraqat alyp, kóz jumdy. Mundaı ázilder qaýipti ǵana emes, sonymen qatar ádep normalaryna sáıkes kelmeıdi, qoǵamdyq tártipti buzyp, qaýipsizdikke qol suǵyp, orny tolmas saldarǵa ákelýi múmkin. Bul kórinisterdiń kýágerleri kóbine shok alyp, kúızeliske ushyraıdy. Al oryndaýshylar óz ómirlerin qaterge tigedi, deıdi Alekeshev.
İshki ister mınıstrligi eskertý jasady.
- Qoǵamdyq tártipti óreskel buzatyn, dúrbeleń týǵyzatyn nemese zıan keltiretin, sondaı-aq adamnyń ar-namysyn qorlaıtyn áreketter úshin ákimshilik jáne qylmystyq jaýapkershilik kózdelgen. Blogerlik pen kameraǵa túsirý quqyq buzýǵa syltaý bolmaýy kerek. Qatygez prankter men qaýipti trúkter — bul óner emes, bul — zań buzýshylyq. Biz osyndaı kontent avtorlaryna úndeý joldaımyz: Kúmándi kórinisti túsirmes buryn nemese oǵan qatyspas buryn saldaryn oı eleginen ótkizińiz; Ómirde de, ınternette de ózgelerdiń sezimin, qaýipsizdigin jáne jeke shekarasyn qurmetteńiz. Zańdy saqtańyzdar jáne quqyqtyq jaýapkershilikke ákeletin áreketterge barmańyzdar, - dedi departament bastyǵy - İİM resmı ókili Shyńǵys Alekeshev.