Áuejaıda júlde ıegerlerín jankúıerler shashu shashyp, dombyramen án salyp, erekshe kútíp aldy
Serbıya astanasy Belgradta ótken álem chempıonatynda bokstan baq synaǵan sportshylar elge oraldy, dep habarlaıdy Almaty-akshamy.kz Baq.kz agenttígíne sílteme jasap.
Búgín túnde Sáken Bıbosynov, Temírtas Júsípov, Serík Temírjanov, Nūrqanat Raıys sekíldí doda jeńímpazdaryn jankúıerler Nūr-Sūltan halyqaralyq áuejaıynan qarsy aldy.
Alǵashqy reıspen 57 kelíge deıín salmaqtaǵy kúmís júlde ıesí Serík Temírjanov pen bírge 75 kelíge deıín salmaqta shırek fınalǵa jetken Nūrqanat Raıys keldí.
23 jastaǵy Serík Pavlodar oblysynyń tarıhynda bokstan álem bírínshílígínde top jarǵan alǵashqy boksshy. Ol būl jetístígímen maqtanatynyn aıtty.
«Álem chempıonatynda bes kezdesu ótkízdím. Onyń tórteuín jeńíspen ayaqtadym. Barlyq jekpe-jegím ońaıǵa soqqan joq. Mysaly, japon boksshysy bıyl jastar arasynda álem chempıony atanǵan. Reseılík boksshyda óz elíníń jeńímpazy. Olımpıadadan keıín álem chempıonatyna barymyzdy salyp daıyndaldyq. Chempıon atanamyn dep oılaǵan edím. Bíraq būıyrǵany kúmís boldy. Fınalda sál qatelík kettí», -dedí Serík Temírjanov.
Eske salaıyq, Serík Temírjanov Belgradta aldymen mońǵol boksshysy Enh-Amarom Harhuudy jeńgen bolatyn. Odan keıín jastar arasynda álem chempıony japonıyalyq Reıto Tsutsmıdí jarys jolynan shyǵardy. Sosyn úndístandyq Rohıt Mordyń osal tūsyn tapsa, shırek fınalda reseılík Eduard Savındy, jartylaı fınalda kubalyq Osvel Kabalero Garsıyaǵa múmkíndík qaldyrǵan joq. Tek fınalda AQSh boksshysy Djamal Harvıden jeńílíske ūshyrady.
Sportshylardyń ekínshí legínde Sáken Bıbosynov, Temírtas Júsípov pen Abylaıhan Júsípov kelíp jettí.
Áuejaıda júlde ıegerlerín jankúıerler shashu shashyp, dombyramen án salyp, erekshe kútíp aldy. Sportshylar da osyndaı erekshe qūrmetke rızashylyqtaryn bíldírdí.
Tokıo-2020 Olımpıadasyndaǵy sátsízdíkten keıín, olqylyqtyń ornyn tyńǵylyqty jattyǵumen toltyrdym deıdí Sáken Bıbosynov tílshílerge bergen jauabynda.
«Tokıo Olımpıadasynda azdaǵan sáttílík jetíspeı qaldy. Sonyń ornyn toltyrdym. Belgradtaǵy álem chempıonatynda jeńípaz atandym. Elímízdíń ánūranyn shyrqatu mańdaıyma jazylǵan eken. Osyǵan qatty quandym. Būl jalǵyz meníń jeńísím emes. Ata-anam, bapkerlerím jáne jankúıer bolǵan halyqtyń jeńísí», - dedí 51 kelíde álem chempıony Sáken Bıbosynov.
Al el qorjynan ekínshí altyn syılaǵan 33 jastaǵy álem chempıony Temírtas Júsípovtíń aıtuynsha, fınaldaǵy jekpe-jek qıynǵa soqqan bíraq bapkerlerdíń tapsyrmasyn oıdaǵydaı oryndap shyqqandyqtan jeńíske jetken.
«Qatelíkke boı aldyrmauǵa tyrystym. Sebebí álem chempıonatyna tek myqtalar keletínín bíldím. Bíraq Allanyń qalauymen altyn aldym. Fınaldyq básekede Taılandtan kelgen Vuttıchaı Yurachaımen kezdestím. Jekpe-jek ońaı bolǵan joq. Bíraq bapkerlerdíń tapsyrmasyn tolyq oryndadym, jeńíske jete aldym. Endí azdap demalysqa kóńíl bólemín. Odan keıín josparymyzdy bapkerímízben aqyldasyp sheshetín bolamyz», -dedí 48 kelí salmaqtaǵy sportshy Temírtas Júsípov.
Sonymen qatar Belgradtaǵy álem chempıonatyna Ūlttyq qūramany bastap barǵan bapker Qaırat Sátjanov komandalyq esepte bírínshí oryn alamyz dep úmíttíń bolǵanyn aıtty. Onyń sózínshe,
«Jalpy komandalyq esepte bírínshí oryn alamyz dep oılap, maqsat qoıyp kelgen edík. Sońǵy sátke deıín úmítímdí úzbedím. Eger kubalyq La Kruz jeńílgende bíz top jaratyn edík. Negízí fınalda qarsylastaryna ese jíbergen ekí boksshynyń bíreuí altyn alǵanda onda kubalyqtarǵa qaramastan bírínshí oryn bízge būıyratyn edí. Bíraq būıyrǵany ekínshí oryn. Ol da jaman emes», - deıdí Qazaqstan qūramasynyń bapkerí Qaırat Sátjanov.
Jalpy komandalyq reıtıngtíń kósh basyn Kuba bastap tūr. «Bostańdyq aralynyń» ókílderí 3 altyn, 2 qola medal ıelengen. Ekínshí orynǵa Qazaqstan ornalassa, úzdík úshtíktí AQSh qūramasy tolyqtyrdy. Olardyń enshísínde 2 altyn, 2 kúmís medal bar.