Almaty ákímí Baqytjan Saǵyntaev jūmys sapary barysynda úsh jol aıryǵynyń qūrylys qarqynyn, metropolıtenníń ınfraqūrylymyn jáne Abaı dańǵylyn qala shekarasyna deıín tesu jūmystaryn tekserdí.
Megapolıs ákímí Almatynyń «shyǵys qaqpasyndaǵy», Būqtyrma kóshesí men Qūlja traktísíníń qıylysyndaǵy jolaıryǵynda boldy. Qūlja traktí arqyly ótetín estakadanyń ūzyndyǵy – 784 m, Būqtyrma kóshesí boıyndaǵy tunneldíń ūzyndyǵy – 570 m. Jyl sońyna deıín jekelegen baǵyttar boıynsha kólík qozǵalysyn ashu josparlanuda. Nysandy tolyq paıdalanuǵa beru kelesí jylǵa josparlanǵan, būl Būqtyrma kóshesíndegí kólík aǵynyn – 30%-ǵa, Qūlja traktísínde ótkízu qabíletín 15%-ǵa arttyruǵa múmkíndík beredí.
B. Saǵyntaev Seıfullın dańǵyly men Jansúgírov kóshesíníń qıylysyndaǵy tunnel túríndegí jolaıryqtyń jūmys barysymen tanysty. Joba boıynsha Seıfullın dańǵyly boıymen kólíktíń kedergísíz qozǵalysy úshín jalpy ūzyndyǵy 690 metr bolatyn ekí tunnel salu qarastyrylǵan. Kólíkterdíń júruí Jansúgírov kóshesíndegí, sondaı-aq ózge kólík qozǵalystary jerdíń betímen ótedí. Tórt jerústí jayau júrgínshíler ótkelderín, trotuarlardy salu, aumaqty abattandyru jáne kógaldandyru qarastyrylǵan.
Jobany 2022 jyly ayaqtau josparlanǵan.
Qala ákímí Rysqūlov dańǵyly men Emtsov kóshesí qıylysyndaǵy jolaıryǵy qūrylysynyń qarqynyn tekserdí. Estakadanyń ūzyndyǵy 186 m, Rysqūlov dańǵylynda – 8, al Emtsov kóshesíníń boıynda 4 jolaq qarastyrylǵan.
Būdan basqa, B. Saǵyntaev árleu jūmystary júríp jatqan Saryarqa jáne Dostyq beketteríndegí metropolıtenníń bírínshí jelísíníń ekínshí kezeńíníń ekínshí íske qosu kesheníníń qūrylys barysymen tanysty. Ekí bekettí tehnıkalyq íske qosu jyl sońyna josparlanǵan.
Sondaı-aq, Almaty ákímíne Qalqaman beketíndegí metropolıtenníń bírínshí jelísíníń ekínshí kezeńíníń úshínshí íske qosu keshenín saludyń jūmys barysy turaly bayandaldy. Jobada Dostyq beketínen Qalqaman beketíne deıín ūzyndyǵy 2,48 shaqyrym bolatyn Áshímov kóshesínen tómen salynatyn quma tonneldíń qūrylysy qarastyrylǵan.
Jūmys sapary kezínde Almaty ákímí Abaı dańǵylyn Qalqaman shaǵyn audanyndaǵy Momyshūly kóshesínen Áuezov kóshesíne deıín úńgíleu jūmysynyń barysyn tekserdí. Onyń jalpy ūzyndyǵy 4,8 km. Shūǵyla shaǵyn audanyndaǵy Yassauı kóshesínen Bereke kóshesíne deıíngí uchaskeníń ūzyndyǵy 3 km, mūndaǵy jūmystar ayaqtalyp qaldy. Joba boıynsha 6 jolaqty jol, trotuarlar, velojoldar salu qarastyrylǵan. Qūrylys aımaǵynda ornalasqan uchaskeler uaqtyly satyp alynsa, onda jūmysty aǵymdaǵy jyldyń sońyna deıín ayaqtau josparlanuda. Osynyń arqasynda Abaı dańǵyly Momyshūly kóshesínen Nauryzbaı audanynyń ákímshílík ortalyǵyna deıín ūzaratyn bolady.
B. Saǵyntaev jolaıryqtary men kóshelerdí úńgíleudíń barlyq nysandary boıynsha jūmys kúshí men tehnıkany keńínen jūmyldyrudy, jūmystyń sapasy men uaqtyly atqaryluyn baqylaudy tapsyrdy. Būdan ózge, tıístí vedomstvolardyń basshylary jobalardy íske asyru kezínde tuyndaıtyn máselelerdí jedel sheshulerí qajet.