Tek osy jaǵdaıda sauda júıesí dúken sórelerínde ádíl, negízdelgen baǵanyń qalyptasuyn qamtamasyz ete alady.
QR Sauda jáne ıntegratsıya mınıstrí Baqyt Sūltanov vedomstvonyń basty maqsatyn atady, dep habarlaıdy Almaty-akshamy.kz.
«Mınıstrlíktíń maqsaty – barsha óndírístík-ótkízu tízbegíne qatysushylar múddeleríníń teńgerímín qalyptastyru. Būl tūrǵyda óndírushíler men treıderler, logıster men transportshylar, satushylar jáne tūtynushylar qamtylady. Būl teńgerímdí qamtamasyz etu úshín barlyq protsestíń naqty koordınatsıyasy, atalǵan tízbektegí barsha buyndar oıynshylarynyń erkín árí ashyq básekelestígí kerek», - dedí Baqyt Sūltanov onlaın rejımde halyq aldynda esep beruí kezínde.
Onyń paıymdauynsha, tek osy jaǵdaıda sauda júıesí dúken sórelerínde ádíl, negízdelgen baǵanyń qalyptasuyn qamtamasyz ete alady.
«Būl ūstanymdardy būzu - pandemıya áserínen osy problemalardy kórsettí. Yaǵnı sońǵy bír jarym jylda álem elderínde jáne bízde azyq-túlík qūny ósímí dúrbeleńíne alyp keldí. Úkímet der kezínde áser etuge tyrysty jáne áleumettík azyq-túlík ónímderíne baǵany tūraqtandyru boıynsha jol kartasyn qabyldady», - dedí mınıstr.
Būl rette ol kartop baǵasynyń qymbattauy sebebíne toqtaldy. «Úılesímsíz qadamnyń basty kórínísí – ol sońǵy bírneshe aptada oryn alǵan kartopqa qatysty jaǵdaı men onyń tapshylyǵy. Naryqtaǵy teńgerímsízdík soltústík óńírlerdegí kúzgí kartop tausylǵanda jáne ońtústík aumaqta jańa ónímdí jınaǵan kezde der kezínde óńíraralyq ózara ís-qımylda retteluí kerek. Onyń íshínde forvardty satyp alu eskerílgen jón. Ol úshín jergílíktí atqarushy organdarda resurstar bar», - dedí Baqyt Sūltanov.