Almaty qalasy máslıhatynyń depýtaty Bolat Ibragımulynyń bastamasymen «Aqsaı» balalar aýrýhanasynyń kishkentaı pasıentteri jańa jyldyq syılyqtar men shattyqqa bólendi.
Jańa jyl qarsańynda S.D.Asfendıarov atyndaǵy QazUMÝ-dyń Respýblıkalyq klınıkalyq «Aqsaı» balalar aýrýhanasynda kishkentaı naýqastarǵa arnalǵan erekshe, jyly da shynaıy jańa jyldyq shara ótti. Almaty qalasy máslıhatynyń depýtaty Bolat Ibragımulynyń bastamasymen emdelip jatqan balalarǵa syılyqtar ázirlenip, merekelik baǵdarlama men anımatorlardyń qoıylymdary uıymdastyryldy. Sharanyń maqsaty – balalarǵa qýanysh syılap, merekelik kóńil-kúı qalyptastyrý.
Otyzdan astam bala jańa jyldyq syılyqtar men jyly tilekter aldy. «AMANAT» partıasynyń eriktileri men anımatorlar oıyndar, ázil-qaljyń jáne kóńildi qoıylymdar usynyp, balalardyń júzinde shynaıy kúlki men qýanysh syılaı aldy. Dárigerlerdiń aıtýynsha, mundaı sharalar balalarǵa em-sharalardan bir sát nazaryn bólip, emosıonaldyq qoldaý beredi.
Eske sala keteıik, «Aqsaı» aýrýhanasy – ortalyq júıke júıesi aýrýlary, tirek-qımyl apparatynyń buzylystary, endokrınologıalyq jáne tuqym qýalaıtyn dertteri bar balalarǵa kómek kórsetetin kópsalaly medısınalyq mekeme. Munda kún saıyn úlken jaýapkershilik pen janashyrlyqty talap etetin mańyzdy jumys – emdeý, ońaltý jáne balalar men olardyń otbasylaryna qoldaý kórsetý júzege asyrylady.
«Kishkentaı ǵana kóńil men meıirimniń ózi balaǵa úmit pen qýanysh syılaı alady. Men úshin bul balalardyń ózderin jalǵyz emes, janynda senetin ári qoldaıtyn adamdar bar ekenin sezinýi mańyzdy. Dárigerler men aýrýhana ujymyna janqıar eńbekteri men adamı jylýlyǵy úshin shyn júrekten alǵys aıtamyn»,- dedi Bolat Ibragımuly.
Osyndaı ıgi bastamalar balalarǵa mereke atmosferasyn sezinýge múmkindik berip, emdelý kezeńinde de janynda jylýlyq pen qamqorlyq bar ekenin eske salady.