Bakuda kóptegen qala tūrǵyndary men qonaqtarynyń basyn qosqan Kóktemgí qaıyrymdylyq jármeńkesí óttí, – dep habarlaıdy aqshamnews.kz tílshísí.
Ís-sharany Baku halyqaralyq áıelder kluby (International Women's Club – Baku) jáne Qazaqstannyń Ázerbaıjandaǵy Elshílígí ūıymdastyrdy.
Jármeńkege Bakuda qyzmet etetín ondaǵan elshílíkter, jergílíktí jáne sheteldík kompanıyalar, sondaı-aq eríktíler qoldau kórsettí.
Qazaqstannyń Ázerbaıjandaǵy Elshísí Álím Baıel qūttyqtau sózínde álemde oryn alyp jatqan daǵdarystar kezínde mūndaı ís-sharalardyń erekshe mańyzdylyǵyn atap óttí. Dıplomat ózara kómek pen mūqtaj jandarǵa, ásírese balalar men áıelderge, qoldau kórsetu bízdíń órkenıettík kodymyzdyń ajyramas bólígí ekenín aıtty. Qazaqstan Prezıdentí Qasym-Jomart Toqaev eríktílíkke erekshe mán beredí.
Baku halyqaralyq áıelder klubynyń prezıdentí Ásemgúl Baıel jármeńkení ūıymdastyruǵa úles qosqan barlyq jandarǵa alǵysyn bíldíríp, árbír qaıyrymdylyq kómegí óz ıesíne jetetínín atap óttí. Jınalǵan qarajat sheıítter otbasylary men ardagerlerdí, erekshe qajettílíkterí bar balalardy, kásíp bastauǵa nıettí jáne kómekke mūqtaj áıel kásípkerlerdí, jalǵyzbasty analardy, balalar úılerín qoldauǵa jūmsalady. Ásemgúl Baıel klubtyń mıssıyasy mūqtaj jandardy qoldau jáne ártúrlí mádenıet ókílderí arasyndaǵy dıalogty damytu ekenín jetkízdí.
Ís-sharanyń ashylu saltanatynda Ázerbaıjan Respublıkasy Parlamentíníń Otbasy, áıelder jáne balalar máselelerí jóníndegí komıtetíníń tóraıymy Hıdjran Guseınova, sondaı-aq Ázerbaıjan Respublıkasy Mádenıet mınıstríníń orynbasary Saadat Yusıfova sóz sóıledí. Olar jármeńke ūıymdastyrushylaryna osyndaı ıgí ís úshín alǵystaryn bíldírdí. Qonaqtar qaıyrymdylyq jármeńkesí arqyly Baku tūrǵyndary qazaq mádenıetímen jaqynyraq tanysyp jatqanyn atap óttí.
Jármeńke ayasynda jergílíktí jáne sheteldík sheberlerdíń qolóner būıymdary men túrlí halyqtardyń taǵamdary satyldy. Sonymen qatar, qyzyqty muzykalyq baǵdarlama men oıyn-sauyq ūıymdastyrylyp, lotereya jáne júldeler ūtysy ótkízíldí.
Baku halyqaralyq áıelder kluby (International Women's Club – Baku) –30 jyldan astam būryn qūrylǵan kommertsıyalyq emes ūıym. Ūıym ártúrlí elder men mádenıetterdíń ókíl áıelderdí bíríktíríp, dostyqty, ózara túsínístíktí nyǵaıtuǵa jáne qaıyrymdylyq, áleumettík jobalardy qoldauǵa baǵyttalǵan. Klub múshelerí qatarynda Bakuda akkredıttelgen elshílerdíń jūbaılary, tanymal kásípker áıelder men qoǵam qaıratkerlerí bar. 2026 jylǵy 1 aqpannan bastap Klub prezıdentí bolyp Qazaqstannyń Ázerbaıjandaǵy Elshísíníń jūbaıy Ásemgúl Baıel saılandy. Ūıymnyń vıtse-prezıdentí – ázerbaıjandyq kásípker Djamılya Guseınova.